આજે 22 સપ્ટેમ્બરે સાંજે ચાર વાગ્યાથી ગુજરાતના એકતાનગર (કેવડિયા)માં 72મો નેશનલ ફિલ્મ એવોર્ડ યોજાવા જઈ રહ્યો છે, ત્યારે એવોર્ડ સમારોહમાં હાજરી આપવા અને ત્રણ દિવસના ગુજરાત પ્રવાસને લઈ રાષ્ટ્રપતિ દ્રોપદી મુર્મૂ ગઈકાલે વડોદરા પહોંચ્યા હતા અને ત્યાંથી તેઓ બાય રોડ કેવડિયા માટે નીકળ્યા હતા. બોલિવૂડ એક્ટર કાર્તિક આર્યન ગઈકાલે જ કેડવિયા પહોંચ્યા હતા, જ્યાં હોટલમાં ઢોલ-નગારા અને ગરબા સાથે ભવ્ય સ્વાગત કરાયું હતું.
આ ઉપરાંત એક્ટર રણદીપ હુડ્ડા પત્ની અને બાળક સાથે, મમૂટી, ધનુષ અને એક્ટ્રેસ પદ્મિની કોલ્હાપુરી પણ રાત્રે વડોદરા પહોંચ્યા હતા. આજે એવોર્ડ સમારોહને લઈ બોલિવૂડ અને સાઉથના સ્ટાર્સ તેમજ મુખ્યમંત્રી ભૂપેન્દ્ર પટેલ તેમજ કેન્દ્રીય મંત્રીઓ સહિતના નેતાઓ કેવડિયા પહોંચી રહ્યા છે.
ઉલ્લેખનીય છે કે, વર્ષ 1954થી શરૂ થયેલા નેશનલ ફિલ્મ એવોર્ડના 72 વર્ષના ઇતિહાસમાં પ્રથમ વખત દિલ્હી બહાર સમારોહ યોજાઈ રહ્યો છે અને તેની યજમાની ગુજરાત કરી રહ્યું છે.સ્ટેચ્યુ ઓફ યુનિટીની નજીક ‘બસ બે’ (બસ ટર્મિનલ) વિસ્તારમાં મહેમાનો માટે AC જર્મન ડોમ બનાવવામાં આવ્યો છે, જેમાં 1000 લોકો બેસી શકે તેવી વ્યવસ્થા કરાઈ છે. આ ઉપરાંત મહેમાનોને ગુજરાતી વાનગીઓ પીરસવામાં આવશે. સાંજે 4થી 5:15 વાગ્યા દરમિયાન રાષ્ટ્રપતિ દ્રૌપદી મુર્મુ, કેન્દ્રીય મંત્રીઓ અને મુખ્યમંત્રી ભૂપેન્દ્ર પટેલની ઉપસ્થિતિમાં દીપ પ્રાગટ્ય અને રાષ્ટ્રગાન સાથે મુખ્ય સમારોહની શરૂઆત કરાશે.
સ્ટેચ્યુ ઓફ યુનિટી ખાતે લેઝર, લાઇટ એન્ડ સાઉન્ડ શો
ત્યારબાદ ફીચર ફિલ્મ, નોન-ફીચર ફિલ્મ તેમજ શ્રેષ્ઠ અભિનેતા અને અભિનેત્રી સહિત વિવિધ શ્રેણીઓમાં એવોર્ડ એનાયત કરવામાં આવશે. સાંજે 5:15થી 6 વાગ્યા દરમિયાન રાષ્ટ્રપતિ દ્રૌપદી મુર્મૂ ફિલ્મ ઉદ્યોગની હસ્તીઓને સંબોધન કરશે. તમામ એવોર્ડ વિજેતાઓ સાથે સત્તાવાર ગ્રુપ ફોટોગ્રાફી કરવામાં આવશે. મુખ્ય સમારોહ પૂર્ણ થયા બાદ સાંજે 6:30 વાગ્યા પછી મહેમાનો માટે નર્મદા નદી કાંઠે વિશેષ સાંસ્કૃતિક કાર્યક્રમનું આયોજન કરવામાં આવ્યું છે. આ ઉપરાંત સ્ટેચ્યુ ઓફ યુનિટી ખાતે ખાસ થીમ આધારિત લેઝર તેમજ લાઇટ એન્ડ સાઉન્ડ શોનું પણ આયોજન કરવામાં આવ્યું છે.
ગુજરાતી ફિલ્મ ‘મારણ’ને બેસ્ટ ગુજરાતી ફિલ્મનો અવોર્ડ
72માં નેશનલ ફિલ્મ એવોર્ડમાં ફિલ્મ ‘આર્ટિકલ 370’ને સર્વશ્રેષ્ઠ ફીચર ફિલ્મ, ફિલ્મ ‘શ્રીકાંત’ને સર્વશ્રેષ્ઠ હિન્દી ફિલ્મ અને યામી ગૌતમને લીડિંગ રોલમાં બેસ્ટ એક્ટ્રેસનો એવોર્ડ અપાશે. ગુજરાતી ફિલ્મ ‘મારણ’ને બેસ્ટ ગુજરાતી ફિલ્મનો અવોર્ડ મળશે. જ્યારે, ‘ભ્રમયુગમ’ માટે મમૂટી અને ‘ચંદુ ચેમ્પિયન’ માટે કાર્તિક આર્યનને લીડિંગ રોલમાં બેસ્ટ એક્ટરનો એવોર્ડ અપાશે.
