દિલ્હીમાં આપ સરકારના કથિત દારુ કૌભાંડમાં હવે ઈડીએ રાષ્ટ્રવ્યાપી દરોડાની કામગીરી આરંભી દીધી છે. 6 સપ્ટેમ્બરના 30 ઠેકાણા પરના દરોડા બાદ ઈડીએ હવે એક્સાઈઝ પોલિસી સ્કેમ સંબંધિત મની લોન્ડરિંગ કેસમાં દરોડાનો બીજો રાઉન્ડ શરુ કર્યો છે. ઈડીએ શુક્રવારે સવારે 6 રાજ્યોમાં 40થી વધારે ઠેકાણા પર દરોડા પાડ્યાં હતા જેમાં બેંગ્લુરુ, હૈદરાબાદ, નેલ્લોર, ચેન્નઈ સહિત બીજા શહેરો સામેલ છે. ઈડીના અધિકારીઓએ જણાવ્યું કે દિલ્હી લિકર પોલિસીમાં ગેરરીતિઓ સાથે જોડાયેલા મની લોન્ડરિંગની તપાસના ભાગરુપે 40 ઠેકાણે દરોડા પાડવામાં આવ્યાં છે. 6 રાજ્યોમાં દારુ બિઝનેસમેન, વિતરકોના ઠેકાણાની તલાશી લેવામાં આવી હતી.
ઈડીના અધિકારીઓએ આંધ્રપ્રદેશ, કર્ણાટક, તામિલનાડુ અને દિલ્હી-એનસીઆર વિસ્તારમાં તથા નેલ્લોર શહેરમાં લિકર બિઝનેસમેન, ડિસ્ટ્રીબ્યુટર અને સપ્લાય ચેઈન નેટવર્ક પર વહેલી સવારે દરોડા પાડ્યાં હતા તથા તેમના ઠેકાણા પર સર્ચ ઓપરેશન ચલાવ્યુ હતું. આ પહેલા ઈડી 6 સપ્ટેમ્બરે દિલ્હી, યુપી, પંજાબ, હરિયાણા, તેલંગાણા અને મહારાષ્ટ્રમાં 30 ઠેકાણે દરોડા પાડ્યાં હતા.
ઈડીએ એકલા હૈદરાબાદમાં 25 ઠેકાણે રેડ પાડી
સૌથી વધારે હૈદરાબાદમાં ઈડીના દરોડા પડ્યાં છે. શહેરમાં એકીસાથે 25 જગ્યાએ ઈડીના અધિકારીઓએ તલાશી લીધી છે. આ લખાઈ રહ્યું છે ત્યાં સુધીમાં ઈડીના અધિકારીઓ 25 અલગ અલગ જગ્યાએ તલાશી લઈ રહ્યાં છે.
