ઈન્સ્ટાગ્રામ પર યુવક સાથે મિત્રતા કરવી સગીરાને ભારે પડી

સોશિયલ મીડિયા પર મિત્રતા કેળવવી સગીરાને ભારે પડી છે. સગીરાને વિશ્વાસમાં લઈને મિત્રતા કેળવી આરોપી યુવકે તેની સાથે શારીરિક સંબંધ બાંધ્યા હતા. જો કે સગીરા ગર્ભવતી થતાં યુવકની કરતૂતનો પર્દાફાશ થયો છે. જ્યારે સમગ્ર ઘટનાની જાણ પોલીસને થતા પોલીસે ફરિયાદ નોંધી વધુ તપાસ શરૂ કરી છે.
અમદાવાદ શહેરના પૂર્વ વિસ્તારમાં રહેતી એક સગીરાને પેટમાં દુખાવો થતા સારવાર માટે હોસ્પિટલ લઈ જવામાં આવી હતી. જ્યાં ડોક્ટરે તપાસ કરતા જાણવા મળ્યું હતું કે, સગીરા ગર્ભવતી છે. જેથી સગીરાની માતાએ તેની પૂછપરછ કરતા જાણવા મળ્યું હતું કે, તેઓના ઘરની નજીક રહેતા એક યુવક સાથે બે વર્ષ પહેલાં સોશિયલ મીડિયા પર સંપર્ક થયો હતો. અને ત્યારબાદ બંને એકબીજાને મોબાઈલ નંબરની આપ લે કરી હતી. અને મોબાઈલ પર વાતચીત પણ કરતા હતા.
આરોપીએ સગીરાને મળવા માટે બોલાવી હતી અને અવાવરૂ જગ્યાએ લઈ જઈ તેની સાથે શરીર સંબંધ બાંધવાની માંગણી કરી હતી. સગીરાએ સંબંધ બાંધવાની ના પાડી હોવા છતાં યુવક માન્યો ન હતો અને તેની સાથે શારીરિક સંબંધ બાંધ્યો હતો. અને આ બાબતની જાણ કોઈને ન કરવા માટે કહ્યું હતું. જેથી સગીરાએ આ બાબતની જાણ કોઈને કરી ન હતી. ત્યારબાદ પણ બંને એકબીજા સાથે વાતચીત કરતા હતા અને આરોપી યુવકે સગીરાને મળવા બોલાવી ત્રણથી ચાર વખત શારીરિક સંબંધ બાંધ્યા હતા.