ભાવનગરપરા વિસ્તારમાં આવેલ રેલવે કોલોનીમાં રહેતા પિતા-પુત્ર ઉપર હાદાનગર વિસ્તારમાં રહેતા શખ્સ સહિતનાએ એક્ટિવા સ્કૂટર સરખીરીતે ચલાવવાનું કહ્યાંની દાઝ રાખી તલવાર વડે હુમલો કરતા ઈજાગ્રસ્ત પિતા-પુત્રને સારવાર અર્થે હોસ્પિટલ ખસેડવામાં આવ્યા હતા, જ્યારે હુમલો કરનાર હાદાનગરના શખ્સને પોલીસે હસ્તગત કરી તપાસ હાથ ધરી હતી.
આ અંગે મળતી વિગતો મુજબ ભાવનગરપરા, રેલવે કોલોનીમાં રહેતા સુરજભાઈ રામપ્રીત મૌર્ય ( ઉં. વ.૨૭ ) ગઈકાલે સાંજના સમયે તેમના ઘર પાસે આવેલ પ્રોવિઝન સ્ટોરમાં વસ્તુ લેવા જતા હતા તે દરમિયાન એક્ટીવા સ્કૂટર લઈને નીકળેલા હાદાનગરના ફૈઝલ ફિરોજભાઈ બુકેરા તેનું સ્કૂટર સર્પાકાર રીતે ચલાવતો હોય, સુરજભાઈએ તેને સ્કૂટર વ્યવસ્થિત રીતે ચલાવવાનું કહેતા તેને ગાળો આપી પથ્થરનો છૂટો ઘા કરી જતો રહ્યો હતો.
આ ઘટનાં બાદ એક કલાક પછી સુરેશભાઈ અને તેના પરિવારજનો તેના ઘરે હતા ત્યારે એકટીવા સ્કૂટરનો ચાલક ફેઝલ ફિરોઝભાઈ બુકેરા અને તેની સાથેના અજાણ્યા શખ્સો તેના ઘરમાં ઘૂસી ગયા હતા અને સુરજભાઈ મૌર્ય અને તેના પિતા રામપ્રિતભાઈ હરિનાથ મૌર્ય ઉપર તલવાર વડે હુમલો કરતા ઇજાગ્રસ્ત પિતા- પુત્રને સારવાર અર્થે હોસ્પિટલ ખસેડવામાં આવ્યા હતા. આ બનાવ અંગે સુરજભાઈ મૌર્ય એ બોર તળાવ પોલીસમાં ફરિયાદ નોંધાવતા પોલીસે ફેઝલને હસ્તગત કરી વધુ તપાસ હાથ ધરી હતી.
