9 એપ્રિલ, રવિવારના મેચમાં કોલકાતા નાઈટ રાઈડર્સના બેટ્સમેન રિંકુ સિંઘે ગુજરાત ટાઈટન્સ સામે એવી ઈનિંગ્સ રમી હતી, જેને તે જીવનભર ભૂલી શકશે નહીં. આ મેચ માત્ર કોલકાતાના ચાહકોના મનમાં જ નહીં પરંતુ IPLના ઈતિહાસમાં પણ હંમેશા યાદ રહેશે. ગુજરાતની ટીમની ડબલ હેટ્રિક વાળી આ મેચમાં રિંકુ સિંઘની 5 સિક્સરે કોલકાતાને ઐતિહાસિક જીત અપાવી હતી.આ પહેલા કોઈ પણ બેટ્સમેને છેલ્લી ઓવરમાં સતત 5 સિક્સર ફટકારીને ટૂર્નામેન્ટમાં પોતાની ટીમને જીત અપાવી ન હતી.
છેલ્લી ઓવરમાં કેપ્ટન રાશિદ ખાને યશ દયાલને બોલિંગ કરવાનો ચાન્સ આપ્યો હતો. કોલકાતાની ટીમને 6 બોલમાં 29 રનની જરૂર હતી અને પ્રથમ બોલ પર માત્ર 1 રન થયો હતો જે ઉમેશ યાદવે નોંધાવ્યો હતો. ત્યાર પછી સ્ટેડિયમમાં અને ઘરે બેસીને મેચ જોનારાઓ ગુજરાતની જીતને કન્ફર્મ સમજી ગયા હતા. પણ અહીંથી સ્ટ્રાઈક પર આવેલા રિંકુ સિંહે મેચનો નકશો બદલી નાખ્યો અને એક પછી એક સતત 5 સિક્સર ફટકારીને 30 રન બનાવીને ટીમને જીત અપાવી..
રવિવારે IPLની ડબલ હેડરની પ્રથમ મેચમાં ડિફેન્ડિંગ ચેમ્પિયન ગુજરાત ટાઇટન્સ અને કોલકાતા નાઇટ રાઇડર્સ વચ્ચે રસાકસીનો મુકાબલો થયો હતો. ટોસ જીત્યા બાદ ગુજરાત ટાઈટન્સના કેપ્ટન રાશિદ ખાને પ્રથમ બેટિંગ કરવાનું પસંદ કર્યું હતું. સાઈ સુદર્શન અને વિજય શંકરની ફિફ્ટીના દમ પર ટીમે 4 વિકેટે 204 રન બનાવ્યા હતા.
ગુજરાત ટાઇટન્સનો કેપ્ટન હાર્દિક પંડ્યા ખરાબ તબિયતના કારણે કોલકાતા સામેની આ મેચમાં રમ્યો નહોતો. તેની જગ્યાએ ઓલરાઉન્ડર વિજય શંકરને પ્લેઈંગ ઈલેવનમાં રમાડવામાં આવ્યો હતો અને તેને બેટિંગમાં પણ ડેવિડ મિલરની આગળ મોકલવામાં આવ્યો હતો. આ બેટરે માત્ર 21 બોલમાં અડધી સદી ફટકારી હતી. છેલ્લી ઓવરમાં સિક્સરની હેટ્રિક ફટકારીને તેણે સ્કોર 204 રન સુધી પહોંચાડ્યો હતો. ગુજરાતની ટીમ માટે બેટિંગમાં વિજય શંકરે છગ્ગાની હેટ્રિક ફટકારી હતી, તો બોલિંગમાં રાશિદ ખાને હેટ્રીક લીધી હતી. ઓલ રાઉન્ડર આન્દ્રે રસેલ, સુનીલ નારાયણ અને શાર્દુલ ઠાકુરની સતત ત્રણ બોલમાં ત્રણ વિકેટ લઈને તેણે હેટ્રિક લેવાનો રેકોર્ડ બનાવ્યો હતો. કમનસીબે ગુજરાતની આ બે બે હેટ્રિક બાદ પણ ગુજરાતની ટીમનો પરાજય થયો હતો.
