દિલ્હીની એક શાળામાં બોમ્બ હોવાની ધમકી મળી છે. આ ધમકી ઈ-મેલ દ્વારા આપવામાં આવી હતી. જે બાદ પોલીસે તપાસ શરૂ કરી છે. આ પહેલા પણ દક્ષિણ દિલ્હીની ઘણી શાળાઓમાં આવા ધમકીભર્યા મેલ મળ્યા છે.
અમૃતા સ્કૂલને ઈ-મેલ દ્વારા બોમ્બથી ઉડાવી દેવાની ધમકી આપવામાં આવી છે. અમૃતા સ્કૂલ દક્ષિણ દિલ્હીના પુષ્પ વિહાર વિસ્તારમાં આવેલી છે. સવારે ઈ-મેલ દ્વારા આ ધમકી શાળાને આપવામાં આવી હતી. આ પછી દિલ્હી પોલીસે તપાસ શરૂ કરી છે. દક્ષિણ દિલ્હીના ડેપ્યુટી કમિશનર ચંદન ચૌધરીએ જણાવ્યું કે બોમ્બ ડિસ્પોઝલ ટીમે સ્કૂલની સંપૂર્ણ તપાસ કરી, પરંતુ કંઈ મળ્યું નહીં.
અગાઉ એપ્રિલમાં રાજધાનીની દિલ્હી પબ્લિક સ્કૂલમાં બોમ્બની ધમકી બાદ હોબાળો થયો હતો. બોમ્બની ધમકી મથુરા રોડ સ્થિત ડીપીએસને ઈ-મેલ દ્વારા મોકલવામાં આવી હતી, ત્યારબાદ પોલીસ ઘટનાસ્થળે પહોંચી, તપાસ કરી અને શાળાને ખાલી કરાવી. જોકે, પાછળથી ખબર પડી કે આ ધમકી અફવા હતી.
આ પહેલા 12 એપ્રિલે દિલ્હીની જ એક સ્કૂલમાં બોમ્બની ધમકી મળી હતી. આ ધમકી પણ ઈ-મેલ દ્વારા જ મોકલવામાં આવી હતી. ધમકીભર્યા ઈમેલ બાદ ઈન્ડિયન સ્કૂલ ઓફ ડિફેન્સ કોલોની પોલીસ સ્ટેશન વિસ્તારમાં ખળભળાટ મચી ગયો હતો અને ઉતાવળમાં આખી સ્કૂલ ખાલી કરાવવામાં આવી હતી. બોમ્બ ડિસ્પોઝલ સ્ક્વોડની ટીમ પણ ઘટનાસ્થળે પહોંચી ગઈ હતી અને બોમ્બની તપાસ શરૂ કરી હતી. આ માત્ર એક અફવા હતી.
