વિરાટ કોહલી દ્વારા આખરે IPLમાં 2019ની સિઝન પછી સદી જોવા મળી. 18 મેના રોજ સનરાઈઝર્સ હૈદરાબાદ સામે રમાયેલી મેચમાં વિરાટ કોહલીએ 62 બોલમાં આઈપીએલની છઠ્ઠી સદી પૂરી કરી હતી. આ સાથે હવે કોહલીએ IPLમાં સૌથી વધુ સદી ફટકારવાના મામલે ક્રિસ ગેલના રેકોર્ડની બરાબરી કરી લીધી છે.
સનરાઈઝર્સ હૈદરાબાદ સામેની મેચમાં વિરાટ કોહલીએ પહેલા જ બોલથી જ પોતાનો ઈરાદો વ્યક્ત કર્યો હતો. જ્યારે કોહલીએ આ મેચમાં સિક્સર ફટકારીને પોતાની સદી પૂરી કરી ત્યારે તેની સાથે બેટિંગ કરી રહેલા RCB કેપ્ટન ફાફ ડુ પ્લેસિસ સહિત RCB ડગઆઉટમાં હાજર તમામ ખેલાડીઓએ નમીને તેની ઇનિંગની પ્રશંસા કરી હતી.
કોહલીની સદી પૂરી થતાં જ હૈદરાબાદના રાજીવ ગાંધી ઈન્ટરનેશનલ સ્ટેડિયમમાં હાજર તમામ ચાહકો પણ ખૂબ ખુશ થઈ ગયા હતા. RCB માટે પ્લેઓફની રેસમાં રહેવા માટે આ મેચ જીતવી ખૂબ જ જરૂરી હતી. કોહલીની ઈનિંગના આધારે બેંગ્લોરે માત્ર 8 વિકેટથી જ જીત મેળવી નથી, પરંતુ 14 પોઈન્ટ સાથે પોઈન્ટ ટેબલમાં ચોથું સ્થાન પણ મેળવી લીધું છે.
વિરાટ કોહલી અને ફાફ ડુ પ્લેસિસે આ રેકોર્ડ પોતાના નામે કર્યો હતો
આઈપીએલની 16મી સિઝનમાં અત્યાર સુધી વિરાટ કોહલી અને ફાફ ડુ પ્લેસિસની જોડીએ રોયલ ચેલેન્જર્સ બેંગ્લોર માટે બેટિંગમાં ખૂબ મહત્વની ભૂમિકા ભજવી છે. સનરાઇઝર્સ હૈદરાબાદ સામેની મેચમાં પણ બંનેએ પ્રથમ વિકેટ માટે 172 રનની ભાગીદારી કરીને મેચને એકતરફી બનાવવામાં મહત્વની ભૂમિકા ભજવી હતી. આ સિઝનમાં કોહલી અને ડુ પ્લેસિસે અત્યાર સુધી પ્રથમ વિકેટ માટે કુલ 872 રન જોડ્યા છે.
ફાફ ડુ પ્લેસિસ અને વિરાટ કોહલીની ઓપનિંગ જોડીએ હવે એક સિઝનમાં જોની બેયરસ્ટો અને ડેવિડ વોર્નરની ઓપનિંગ જોડી દ્વારા સૌથી વધુ રન બનાવવાના રેકોર્ડને પાછળ છોડી દીધો છે. વોર્નર અને બેયરસ્ટોએ 2019 સીઝનમાં ઓપનિંગ જોડી તરીકે કુલ 791 રન બનાવ્યા હતા.
