પેટ્રોલ પંપને નિશાન બનાવી લૂંટારુઓ રૂપિયા 7 લાખ અને સીસીટીવીનું ડીવીઆર લઈને ફરાર

રાજ્યના છેવાડે આવેલા વલસાડ જિલ્લાના અંતરિયાળ કપરાડામાં એક લૂંટારૂ ટોળકીએ પેટ્રોલ પંપને નિશાન બનાવ્યો હતો. વાપી નાસિક હાઈવે પર આવેલા પેટ્રોલ પંપને નિશાન બનાવી લૂંટારુઓએ રૂપિયા 7 લાખથી વધુની રોકડ રકમ અને સીસીટીવીનું ડીવીઆર લઈને ફરાર થઈ ગયા હતા. અડધી રાત્રે ત્રાટકેલા લૂંટારાઓએ પેટ્રોલ પંપ પર હાજર સિક્યુરિટી ગાર્ડ અને કર્મચારીને મળી ત્રણ લોકોને બંધક બનાવી અને લૂંટ ચલાવીને ફરાર થઈ ગયા હતા. ફરાર લૂંટારુઓને શોધવા પોલીસ દોડતી થઈ હતી.
બનાવની વિગત મુજબ વલસાડના કપરાડા તાલુકાના છેવાડે આવેલા દીક્ષલ ગામ નજીક નાસીક હાઇવે પર આવેલા હિન્દુસ્તાન પેટ્રોલિયમના તેજસ પેટ્રોલ પંપ પર ગઈ મોડી રાત્રે લૂંટારાઓની ટોળકી ત્રાટકી હતી. ઇકો ગાડીમાં આવેલા દસ જેટલા લૂંટારુઓએ પેટ્રોલ પંપ પર પહોંચી હાજર સિક્યુરિટી ગાર્ડ અને કર્મચારીઓને દાંતરડા અને છરા જેવા તીક્ષણ હથિયારો બતાવી અને બંધક બનાવ્યા હતા. ત્યારબાદ ઓફિસમાં લગાવેલા સીસીટીવી અને ટીવીને પણ તોડફોડ કરી પેટ્રોલ પંપના લોકર અને કબાટ તોડીને લૂંટ ચલાવી હતી. અંદાજે સાત લાખથી વધુના રોકડ રકમ, કર્મચારીના મોબાઈલ અને સીસીટીવીનું ડીવીઆર પણ લઈ અને ફરાર થઈ ગયા હતા.