અદાણી-હિંડનબર્ગ કેસમાં સુપ્રીમ કોર્ટે આજે – 3 જાન્યુઆરીએ સેબીને તપાસ માટે વધુ 3 મહિનાનો સમય આપ્યો છે. ચીફ જસ્ટિસ ડીવાય ચંદ્રચુડ, જસ્ટિસ જેબી પારડીવાલા અને જસ્ટિસ મનોજ મિશ્રાની બેન્ચે આ નિર્ણય આપ્યો છે.
મુખ્ય ન્યાયાધીશે કહ્યું કે સેબીના રેગ્યુલેટરી ફ્રેમવર્કમાં પ્રવેશવાની કોર્ટની સત્તા મર્યાદિત છે. કોર્ટે કહ્યું કે સેબીએ 22માંથી 20 કેસમાં તપાસ પૂર્ણ કરી છે. સોલિસિટર જનરલના આશ્વાસનને ધ્યાનમાં રાખીને, અમે સેબીને અન્ય બે કેસમાં 3 મહિનામાં તપાસ પૂર્ણ કરવા નિર્દેશ આપીએ છીએ. સુપ્રીમ કોર્ટે કહ્યું કે OCCPR રિપોર્ટને સેબીની તપાસ પર શંકાના રૂપમાં ન જોઈ શકાય. સુપ્રીમ કોર્ટનું માનવું છે કે SEBI પાસેથી SITને તપાસ ટ્રાન્સફર કરવાનો કોઈ આધાર નથી.
ગયા વર્ષે 24 નવેમ્બરે કેસની સુનાવણી બાદ કોર્ટે પોતાનો નિર્ણય સુરક્ષિત રાખ્યો હતો. CJIએ કહ્યું- અમારે અમેરિકન કંપની હિંડનબર્ગના રિપોર્ટને હકીકતમાં સાચો માનવાની જરૂર નથી. હિંડનબર્ગ અહીં હાજર નથી, અમે સેબીને તપાસ કરવા કહ્યું છે. 24 જાન્યુઆરી, 2023ના રોજ હિંડનબર્ગ રિસર્ચએ અદાણી ગ્રૂપ સામે મની લોન્ડરિંગથી લઈને શેરની હેરાફેરી સુધીના આરોપો મૂક્યા હતા. સુપ્રીમ કોર્ટે આ કેસની તપાસ માટે 6 સભ્યોની કમિટીની રચના કરી હતી. આ સિવાય માર્કેટ રેગ્યુલેટર સેબી (સિક્યોરિટીઝ એન્ડ એક્સચેન્જ બોર્ડ ઓફ ઈન્ડિયા)ને પણ તપાસ કરવા માટે કહેવામાં આવ્યું હતું.
