વોશિંગ્ટનઅમેરિકાની રાજધાની વોશિંગ્ટન ડીસીમાં એક પેસેન્જર વિમાન અને હેલિકોપ્ટર વચ્ચે ટક્કર થઈ છે. દુર્ઘટના બાદ પેસેન્જર વિમાન પોટોમેક નદીમાં પડી ગયું. વિમાનમાં 64 લોકો સવાર હતા, જેમાં 4 ક્રૂ મેમ્બરનો સમાવેશ થાય છે. વોશિંગ્ટન ફાયર ડિપાર્ટમેન્ટના જણાવ્યા અનુસાર, આ ઘટના બુધવારે રાત્રે રોનાલ્ડ રીગન એરપોર્ટ નજીક બની હતી. અમેરિકન મીડિયા રિપોર્ટ્સ અનુસાર, અત્યાર સુધીમાં 18 મૃતદેહ મળી આવ્યા છે.
આ અકસ્માત અમેરિકન એરલાઇન્સના CRJ700 બોમ્બાર્ડિયર જેટ અને યુએસ આર્મી સિકોર્સ્કી (H-60) હેલિકોપ્ટર વચ્ચે થયો હતો. સેનાના અધિકારીઓના જણાવ્યા અનુસાર, હેલિકોપ્ટરમાં ત્રણ લોકો પણ સવાર હતા.એરલાઇન કંપનીએ રાત્રે 9 વાગ્યા પછી અકસ્માતની પુષ્ટિ કરી. આ જેટ કેન્સાસ રાજ્યથી રાજધાની વોશિંગ્ટન આવી રહ્યું હતું. અધિકારીઓએ જણાવ્યું હતું કે, રીગન નેશનલ એરપોર્ટ (DCA) નજીક સ્થાનિક સમય મુજબ રાત્રે 8:50 વાગ્યા પછી વિમાન દુર્ઘટના અંગે અનેક ફોન કોલ આવ્યા હતા. હાલમાં, એરપોર્ટ પર બધી ફ્લાઇટ્સ અને લેન્ડિંગ બંધ કરી દેવામાં આવ્યા છે. બંને વિમાનોનો કાટમાળ પોટોમેક નદીમાં છે.
