ભાવનગર,તા.6
ભાવનગર જિલ્લાના મહુવા શહેરમાં ફાતેમા સોસાયટી પાસે જાહેરમાં સ્ટ્રીટ લાઈટના અજવાળે ગંજીપત્તા વડે જુગાર રમી રહેલા ૬ ઇસમોને પોલીસે બાતમીના આધારે રંગેહાથ ઝડપી પાડ્યા છે.
મહુવા પોલીસ મથકના કોન્સ્ટેબલ ધર્મેન્દ્રસિંહ વાળાને ચોક્કસ બાતમી મળી હતી કે ફાતેમા સોસાયટી પાસે નુરાની બાગ નજીક આવેલી મસ્જિદ પાસે કેટલાક શખ્સો એકઠા થઈને જુગાર રમી રહ્યા છે. આ બાતમીના આધારે પોલીસે રાત્રિના સમયે ઓચિંતો દરોડો પાડ્યો હતો. પોલીસને જોઈને ગલીઓમાં નાસભાગ મચી ગઈ હતી, પરંતુ પોલીસે કુનેહપૂર્વક આખા વિસ્તારને કોર્ડન કરીને જુગાર રમી રહેલા તમામ ૬ શખ્સોને દબોચી લીધા હતા.
પકડાયેલા આરોપીઓમાં અબુબકર અનવરભાઈ ઉમરાણી, મોસીન રહીમભાઈ કુરેશી, યાસીન રહીમભાઈ કુરેશી, અને ફિરોઝ હાજીભાઈ સૈયદ (તમામ ધંધો- ડ્રાઈવર) તેમજ નાજીર હબીબભાઈ કુરેશી અને મુસ્તફા હારૂનભાઈ સૈયદ (બંને ધંધો- મજૂરી) નો સમાવેશ થાય છે. પોલીસે જુગારના પટમાંથી રોકડા ₹૧૦,૨૮૦ તથા ગંજીપત્તાનો મુદ્દામાલ જપ્ત કર્યો છે. મહુવા પોલીસે તમામ શખ્સો વિરૂદ્ધ જુગારધારાની કલમ ૧૨ હેઠળ ગુનો નોંધી આગળની કાયદેસરની તજવીજ હાથ ધરી છે.
