પાલીતાણા રૂરલ પોલીસ સ્ટેશન વિસ્તારમાં ગત રાત્રિ પેટ્રોલિંગ દરમિયાન પોલીસે એક કારમાંથી ગેરકાયદેસર બીયરના જથ્થા સાથે બે શખ્સોને ઝડપી પાડ્યા છે. પકડાયેલા બંને ઇસમો નશાની હાલતમાં વાહન ચલાવી રહ્યા હોવાનું પણ સામે આવ્યું છે.
પોલીસ મથકેથી મળતી માહિતી મુજબ, આજ રોજ મધ રાત્રીના ૦૧:૪૫ વાગ્યે પોલીસ સ્ટાફ નોંઘણવદર ગામ પાસે વાહન ચેકિંગમાં હતો. તે દરમિયાન સણોસરા તરફથી આવી રહેલી એક મારુતિ સુઝુકી ટુર ફોરવ્હીલ ગાડી નંબર: GJ-14-Z-8071 ને રોકી તપાસ કરવામાં આવી હતી. કાર ચાલક હિતેશભાઈ ભાયલાલભાઈ ભાલાળા ઉ.વ. ૨૮, રહે.પાંચટોબરા, ગારીયાધાર અને બાજુમાં બેસેલા આદિત્યભાઈ વીલાસગિરી ગૌસ્વામી ઉ.વ.૨૫, રહે.વેળાવદર, હાલ સુરત બંને કેફી પીણું પીધેલી હાલતમાં જણાયા હતા.
પોલીસે પંચોની હાજરીમાં કારની તલાશી લેતા ડ્રાઈવર સીટની પાછળથી એક પ્લાસ્ટિકની થેલી મળી આવી હતી. જેમાંથી પરપ્રાંતીય (દમણ અને દીવની) ‘બર્ડવાઇઝર મેગનમ પ્રીમીયમ બીયર’ ના ૫૦૦ એમ.એલ.ના કંપની સીલપેક ૫ ટીન કુલ કિંમત રૂ. ૬૧૫ મળી આવ્યા હતા. બંને ઇસમો પાસે આ અંગે કોઈ પાસ કે પરમિટ ન હોવાથી પોલીસે મુદ્દામાલ જપ્ત કર્યો છે. આરોપીઓ વિરૂદ્ધ પ્રોહિબિશન એક્ટની કલમ ૬૫(એ)(એ), ૧૧૬(બી) તેમજ નશાની હાલતમાં વાહન ચલાવવા અંગે અલગથી ગુનો નોંધી કાયદેસરની કાર્યવાહી હાથ ધરી છે.
