ભાવનગર મહાનગરપાલિકા વિસ્તારની જીવાદોરી સમાન શેત્રુંજી ડેમ ચાલુ સીઝનમાં પ્રથમ વખત ઓવરફ્લો થયો છે. ડેમ છલકાઈ જતાં ભાવનગર શહેર માટે આગામી ઉનાળાની સીઝન સુધી પીવાના પાણીની ઉપલબ્ધતા સુનિશ્ચિત થઈ ગઈ છે, જેનાથી નાગરિકોમાં ખુશીનો માહોલ છે.
આ પવિત્ર નવા નીરના વધામણાં કરવા માટે ડેમ સાઈટ પર એક ખાસ કાર્યક્રમ યોજાયો હતો. જેમાં ભાવનગરના મેયર, મ્યુનિસિપલ કમિશનર, સ્ટેન્ડિંગ કમિટીના ચેરમેન, શાસક પક્ષના નેતા, વોટર વર્ક્સ કમિટીના ચેરમેન અને ડેપ્યુટી ચેરમેન તેમજ વિવિધ નગરસેવકો હાજર રહ્યા હતા. તમામ મહાનુભાવોએ મીડિયા પ્રતિનિધિઓની હાજરીમાં શાસ્ત્રોક્ત વિધિ-વિધાન પૂર્વક જળના વધામણાં કર્યા હતા અને શહેરીજનોને શુભેચ્છાઓ પાઠવી હતી. વોટર વર્ક્સ વિભાગના કાર્યપાલક ઈજનેર દ્વારા જાહેર હિત માટે આ વિગત જાહેર કરવામાં આવી છે.
