ભાવનગર શહેરના મીણબત્તી સર્કલ પાસે જોગર્સ પાર્ક વિસ્તારમાં ગત ગઈકાલે તા.૧૯ જુલાઈના રોજ સાંજના સુમારે એક અકસ્માત સર્જાયો હતો જેમાં એક યુવકને ઇજા થતા સારવાર માટે હોસ્પિટલ ખસેડાયો હતો.
શહેરના અલકા રોડ પર રહેતા સમીર કાદરભાઈ મલેક (ઉ.વ.૨૧) અને તેમનો મિત્ર રિઝવાન કુરેશી પોતાનું બાઈક નંબર GJ-04-EE-3366 લઈને નીલમબાગથી હિમાલિયા મોલ તરફ જઈ રહ્યા હતા.આ દરમિયાન, રોંગ સાઈડમાંથી પૂરઝડપે અને ગફલતભરી રીતે આવી રહેલા એક એક્ટિવા નંબર GJ-04-CL-1202 ચાલકે તેમના બાઈકને જોરદાર ટક્કર મારી હતી. આ અકસ્માતમાં બંને મિત્રો રસ્તા પર પટકાયા હતા. સમીરને સામાન્ય ઈજા પહોંચી હતી, પરંતુ બાઈક ચલાવી રહેલા રિઝવાનને માથાના ભાગે ગંભીર ઈજાઓ થતાં તે બેભાન થઈ ગયો હતો. અકસ્માત સર્જીને એક્ટિવા ચાલક પોતાનું વાહન મૂકીને ઘટનાસ્થળેથી ફરાર થઈ ગયો હતો. ઈજાગ્રસ્ત રિઝવાનને તાત્કાલિક ખાનગી વાહનમાં સરટી હોસ્પિટલ દાખલ કરવામાં આવ્યો છે. આ મામલે સમીર મલેકે ફરાર એક્ટિવા ચાલક વિરુદ્ધ ફરિયાદ નોંધાવતા નિલમબાગ પોલીસે ગુનો નોંધી વધુ તપાસ હાથ ધરી છે.
