ભાવનગરના બોરતળાવ પોલીસ સ્ટેશનના સ્ટાફે ખાનગી બાતમીના આધારે કુંભારવાડા વિસ્તારમાં રેડ કરીને ગેરકાયદેસર ઇંગ્લિશ દારૂના જથ્થા સાથે એક શખ્સને ઝડપી લઇ ધોરણસરની કાર્યવાહી કરી હતી.
બોરતળાવ પોલીસ સ્ટાફ કુંભારવાડા સર્કલ પાસે પેટ્રોલિંગમાં હતો ત્યારે બાતમી મળી હતી કે,કુંભારવાડા મફતનગર શેરી નં.૧માં રહેતો આકાશ બીપીનભાઈ રાજગોર (ઉ.વ.૨૧) શાંતિનગર સાબુના કારખાના પાસે દારૂનું વેચાણ કરે છે.આ બાતમીના આધારે પોલીસે બે પંચોને સાથે રાખીને દરોડો પાડ્યો હતો, જેમાં સ્થળ પરથી આકાશ રાજગોર ઝડપાઈ ગયો હતો.
આકાશ પાસે રહેલી કાપડની થેલીની તલાશી લેતા તેમાંથી ‘મેકડોવેલ્સ નં. ૧ રિઝર્વ વ્હિસ્કી’ની ૧૮૦ MLની ૫ સીલબંધ બોટલો મળી આવી હતી. પોલીસે રૂ. ૬૬૫ ની કિંમતનો આ દારૂનો જથ્થો કબજે કર્યો હતો અને આરોપી પાસે પાસ કે પરમિટ ન હોવાથી તેની પ્રોહીબિશન એક્ટની કલમ ૬૫(એ)(એ) અને ૧૧૬(બી) મુજબ અટકાયત કરી આગળની કાયદેસરની કાર્યવાહી હાથ ધરી છે.
