તળાજા પોલીસ સ્ટેશનની ટીમે તળાજા વિસ્તારમાં પેટ્રોલીંગ દરમિયાન મળેલી બાતમીના આધારે રાળગોન ગામે રેડ કરી હતી. આ રેડ દરમિયાન રાળગોનથી બગદાણા જતા રોડ પર આવેલી વાડીના મકાનમાંથી વિદેશી દારૂનો જથ્થો મળી આવતા જપ્ત કર્યો હતો.
તળાજા પોલીસે પંચોની હાજરીમાં વાડીના રહેણાંક મકાનના રસોડા પાસેથી તલાશી લેતા ત્યાંથી પ્લાસ્ટિકની થેલી મળી આવી હતી. જેમાં મધ્યપ્રદેશમાં વેચાણ માટેના માર્કાવાળી ૧૮૦ એમ.એલ.ની કંપની સીલપેક વિદેશી દારૂની બોટલો નંગ ૧૫ (કિંમત રૂ. ૨,૦૨૫) મળી આવી હતી. રેડ દરમિયાન મકાન માલિક ભયલુભા રણજીતસિંહ ગોહિલ હાજર મળી આવ્યા ન હતા.આ મામલે પોલીસે પ્રોહિબિશન કલમ ૬૫(એ)(એ) અને ૧૧૬(બી) મુજબ ગુનો દાખલ કરી, હાજર ન મળી આવેલા ભયલુભા રણજીતસિંહ ગોહિલ રહે. રાળગોન, તા. તળાજા,વિરુદ્ધ કાયદેસરની કાર્યવાહી હાથ ધરી છે.
