ઉત્તરપ્રદેશના વારાણસીમાં રવિવારે સવારે થયેલા એન્કાઉન્ટરમાં ૩૦ લાખ રૂપિયાના ઈનામી નકસલી વૃજેશ ગંઝૂ ઉર્ફે ગોપાલસિંહ ભોકતાનું મોત થયું. વૃજેશ ઝારખંડના પ્રતિબંધિત નકસલી સંગઠન ટીપીસીનો કમાન્ડર હતો. એના પર ઝારખંડ સરકારે ૨૫ લાખ રૂપિયા, જ્યારે એનઆઈએએ પાંચ લાખ રૂપિયાનું ઈનામ જાહેર કર્યું હતું.
છેવટે, વૃજેશ ગંઝૂ કોણ હતો ? ઝારખંડનો ગુંડો વારાણસીમાં શું કરી રહ્યો હતો ? પોલીસે જણાવ્યું કે વૃજેશ ગંઝૂ ઉર્ફે ગોપાલસિંહ ભોકતા ઝારખંડના ચતરા જિલ્લામાં રહેતો હતો. એ ઝારખંડના પ્રતિબંધિત સંગઠન ટીપીસીનો કમાન્ડર હતો. વૃજેશ ટેરર ફંન્ડિંગ, નકસલી ગતિવિધિઓ તથા પોલીસ અને સુરક્ષા દળો પર હુમલા કરવા જેવા ગંભીર ગુનાઓમાં સંડોવાયેલો હતો. અનેક તપાસ-એજન્સીઓ એને શોધી રહી હતી. આજે એટીએસને માહિતી મળી કે ૩૦ લાખનો ઈનામ નકસલી વારાણસી પંથકમાં મોજૂદ છે. એટીએસના જવાનોએ એને રોકવાની કોશિશ કરી. જવાબમાં વૃજેશે ફાયરિંગ કરતા સામેથી પણ ગોળીઓ છૂટી. વૃજેશ ગોળીબારમાં ઘાયલ થયા પછી હોસ્પિટલમાં એનું મોત થયું.
