વિંગ કમાન્ડર દીપિકાને શૌર્ય પુરસ્કાર

વાયુસેનાના વડા એર ચીફ માર્શલ વીઆર ચૌધરીએ એરફોર્સ ઓડિટોરિયમ, સુબ્રતો પાર્ક ખાતે આયોજિત સમારોહમાં ઘણા અધિકારીઓ અને વાયુ યોદ્ધાઓને યુદ્ધ સેવા મેડલ અને અન્ય પુરસ્કારો અર્પણ કર્યા હતા. પ્રવક્તાએ કહ્યું કે વાયુસેનાના બે અધિકારીઓને યુદ્ધ સેવા મેડલ, 13 અધિકારીઓ અને વાયુ યોદ્ધાઓને વાયુ સેના મેડલ (વીરતા), 13 અધિકારીઓને વાયુ સેના મેડલ અને 30 વિશિષ્ઠ સેવા મેડલ એનાયત કરવામાં આવ્યા હતા. કુલ 58 લોકોએ એવોર્ડ મેળવ્યા હતા, જેમાં ભારતીય વાયુસેનાના 57 અને આર્મીમાંથી એકનો સમાવેશ થાય છે.
વિંગ કમાન્ડર દીપિકા મિશ્રા ગુરુવારે ભારતીય વાયુસેનામાં શૌર્ય પુરસ્કાર મેળવનાર પ્રથમ મહિલા અધિકારી બની છે. વાયુસેનાના પ્રવક્તાના જણાવ્યા અનુસાર, રાજસ્થાન સ્થિત હેલિકોપ્ટર પાઇલટ મિશ્રાને મધ્યપ્રદેશમાં પૂર રાહત કામગીરી દરમિયાન દર્શાવવામાં આવેલ ‘અસાધારણ હિંમત’ માટે વાયુ સેના મેડલ (વીરતા) એનાયત કરવામાં આવ્યો છે.
વિંગ કમાન્ડર મિશ્રા વિશે વાત કરતાં તેમણે કહ્યું કે ભારતીય વાયુસેનાના ઈતિહાસમાં વીરતા પુરસ્કાર મેળવનાર ભારતીય વાયુસેનાની તે પ્રથમ મહિલા અધિકારી છે. તેમણે કહ્યું કે, ભારતીય વાયુસેનાની મહિલાઓને તેમના સેવા પ્રત્યેના સમર્પણ માટે ભૂતકાળમાં પુરસ્કારો મળ્યા છે, પરંતુ આ પ્રથમ વખત છે જ્યારે વાયુસેનાની મહિલા અધિકારીને વીરતા પુરસ્કારથી સન્માનિત કરવામાં આવી છે.