ઇન્ડિયન પ્રિમિયર લીગ 2023માં ચેપોક મેદાન પર ચેન્નઈ સુપર કિંગ્સ અને કોલકાતા નાઈટ રાઈડર્સ વચ્ચે રવિવારે એક રસપ્રદ મેચ રમાઈ હતી. કોલકાતાએ આ મેચ છ વિકેટે જીતી લીધી હતી. પ્રથમ બેટિંગ કરતા ચેન્નઈએ 20 ઓવરમાં છ વિકેટે 144 રન બનાવ્યા હતા. જવાબમાં કોલકાતાએ 18.3 ઓવરમાં ટાર્ગેટ હાંસલ કરી લીધો હતો. આ જીતે પ્લેઓફમાં સ્થાન મેળવવા માટે ચેન્નાઈની રાહ લંબાવી હશે પરંતુ મેચ પછી જે બન્યું તેનાથી ચાહકો ભાવુક થઈ ગયા.
વાસ્તવમાં મેચ પછી ચેન્નઈના ખેલાડીઓ ફેન્સનો આભાર માનવા માટે ચેન્નઈ સ્ટેડિયમને ચક્કર લગાવ્યું હતું. દરમિયાન, ભારતના ભૂતપૂર્વ કેપ્ટન સુનીલ ગાવસ્કર, જે IPLમાં કોમેન્ટ્રી ટીમનો ભાગ છે, CSK કેપ્ટન ધોની પાસે દોડીને આવ્યા હતા અને શર્ટ પર ઓટોગ્રાફની માંગ કરે છે. આ પછી ધોની હસવા લાગ્યો અને તેણે ગાવસ્કરના શર્ટ પર ઓટોગ્રાફ આપ્યો હતો. આ ક્ષણ જોઈને ચેપોક સ્ટેડિયમમાં હાજર ફેન્સ અને સોશિયલ મીડિયા યુઝર્સ ભાવુક થઈ ગયા.
વાસ્તવમાં, આ પ્રથમ વખત છે જ્યારે મહાન ગાવસ્કરે તેમના શર્ટ પર વર્તમાન ખેલાડીનો ઓટોગ્રાફ લીધો છે. ગાવસ્કર 1983 ODI વર્લ્ડ કપ અને ધોની 2011 ODI વર્લ્ડ કપ વિજેતા ટીમનો ભાગ રહી ચુક્યા છે. તે આ પહેલા પણ ઘણી વખત ધોની પ્રત્યે આદર વ્યક્ત કરી ચૂક્યા છે. ઓટોગ્રાફ લીધા પછી તરત જ ગાવસ્કર અને ધોનીએ પણ એકબીજાને ગળે લગાવ્યા. આ પછી ધોની ત્યાંથી ચાલ્યો ગયો. ધોની જતાની સાથે જ ગાવસ્કરે કોમેન્ટ્રીમાં હસતાં હસતાં ઓન એર કહ્યું- મહેરબાની કરીને મને આગળની બાકીની મેચો માટે નવો ગુલાબી શર્ટ આપો. માત્ર ગાવસ્કર જ નહીં, KKRના રિંકુ સિંહ અને વરુણ ચક્રવર્તી પણ મેચ બાદ પોતાની જર્સી પર ધોનીનો ઓટોગ્રાફ લેતા જોવા મળ્યા હતા.
CSK vs KKR: કોલકત્તાએ ચેન્નઇને છ વિકેટથી હરાવ્યુ, નીતિશ-રિંકુનું શાનદાર પ્રદર્શન
ઇન્ડિયન પ્રિમિયર લીગ 2023ની 61મી મેચમાં ચેન્નઈ સુપર કિંગ્સે કોલકાતા નાઈટ રાઈડર્સ સામે છ વિકેટથી હારનો સામનો કરવો પડ્યો હતો. આ મેચમાં પ્રથમ બેટિંગ કરતા ચેન્નઈએ છ વિકેટ ગુમાવીને 144 રન બનાવ્યા હતા. જવાબમાં કોલકાતાની ટીમે 18.3 ઓવરમાં ચાર વિકેટ ગુમાવીને 147 રન બનાવીને મેચ જીતી લીધી હતી. આ જીત સાથે કોલકાતાના 13 મેચમાં 12 પોઈન્ટ થઈ ગયા છે અને આ ટીમ પ્લેઓફની રેસમાં યથાવત છે. હાર છતાં ચેન્નઈની ટીમ પોઈન્ટ ટેબલમાં બીજા સ્થાને યથાવત છે. પ્લેઓફમાં પહોંચવા માટે ચેન્નઈને તેની છેલ્લી મેચ જીતવી પડશે અથવા તો નસીબનો સાથ જોઈએ.
