ICC વર્લ્ડ ટેસ્ટ ચેમ્પિયનશિપની ફાઇનલ મેચમાં ત્રીજા દિવસે (9 જૂન) રમત સમાપ્ત થઈ ગઈ છે. આજે ચોથા દિવસે ઓસ્ટ્રેલિયા તેની બીજી ઇનિંગમાં 4 વિકેટે 123 રનથી આગળ રમવાનું શરૂ કરશે. માર્નસ લાબુશેન (41) અને કેમેરોન ગ્રીન (7) અણનમ છે. ત્રીજા દિવસની રમતના અંત સુધીમાં ઓસ્ટ્રેલિયાએ ભારતીય ટીમ સામે કુલ 296 રનની લીડ બનાવી લીધી છે. આ દૃષ્ટિકોણથી ઓસ્ટ્રેલિયાએ આ મેચમાં મજબૂત પકડ બનાવી લીધી છે.
જો ભારતીય ટીમને આ મેચ જીતવી હશે તો તેણે 121 વર્ષ જૂનો રેકોર્ડ તોડવો પડશે. આ WTC ફાઈનલ મેચ લંડનના ઓવલ મેદાન પર રમાઈ રહી છે. અહીં રેકોર્ડ એ છે કે, ટેસ્ટ મેચમાં સૌથી મોટા ટાર્ગેટનો પીછો માત્ર 263 રનનો હતો. 121 વર્ષ પહેલા એટલે કે 1902માં પણ આ લક્ષ્યનો પીછો કરવામાં આવ્યો હતો. જ્યારે ઈંગ્લેન્ડે ઓસ્ટ્રેલિયાને 1 વિકેટે હરાવ્યું હતું. ત્યારથી અત્યાર સુધી આ રેકોર્ડ ઓવલના આ મેદાન પર યથાવત છે. જો આ વખતે ભારતીય ટીમે ચેમ્પિયનશિપનો ખિતાબ જીતવો હશે તો આ રેકોર્ડ તોડવો પડશે. જોકે 121 વર્ષ લાંબો સમય છે. આ દરમિયાન પિચમાં ઘણા ફેરફાર કરવામાં આવ્યા છે. જો વિરાટ કોહલી, શુભમન ગિલ, રોહિત શર્મા, અજિંક્ય રહાણે જેવા બેટ્સમેન આ ઇનિંગમાં ચાલે છે તો આ રેકોર્ડ તોડી શકે છે.
