વડાપ્રધાન નરેન્દ્ર મોદી આજે 2 એપ્રિલે રાજસ્થાન અને ઉત્તરાખંડમાં ચૂંટણી પ્રચાર કરશે. મોદી ઉત્તરાખંડના ઉધમ સિંહ નગર જિલ્લાના રૂદ્રપુર અને રાજસ્થાનના જયપુર ગ્રામીણમાં કોટપુતલીમાં જનસભાને સંબોધિત કરશે. આ દરમિયાન તેઓ ઉત્તરાખંડ અને રાજસ્થાનમાં રેલી પણ કરશે. રેલીની સલામતી સુનિશ્ચિત કરવા માટે પોલીસ પ્રશાસન દ્વારા કડક સુરક્ષાના પગલાં અમલમાં મૂકવામાં આવ્યા છે.
લોકસભા ચૂંટણીને કારણે, PM મોદી આજે ઉત્તરાખંડની મુલાકાતે છે. ઉત્તરાખંડમાં લોકસભાની પાંચ બેઠકો માટે પ્રથમ તબક્કામાં 19 એપ્રિલે ચૂંટણી યોજાવાની છે. આ દિવસે તેઓ નૈનીતાલ-ઉધમ સિંહ નગર સંસદીય બેઠક હેઠળના રૂદ્રપુરમાં પાર્ટીના ઉમેદવારોના સમર્થનમાં ચૂંટણી રેલીને સંબોધિત કરશે. હાલમાં ઉત્તરાખંડની પાંચેય બેઠકો 2014થી ભાજપ પાસે છે અને રાજ્યમાં પણ ભાજપ સત્તામાં છે. આ કાર્યક્રમમાં મુખ્યમંત્રી પુષ્કર સિંહ ધામી, ભાજપના ઉમેદવારો અને રાજ્યના અધિકારીઓ હાજર રહેશે. પીએમ મોદી ઉત્તરાખંડમાં પોતાનો કાર્યક્રમ પૂરો કરીને રાજસ્થાન જવા રવાના થશે.
પીએમની બેઠક જયપુર ગ્રામીણના કોટપુતલીમાં બપોરે યોજાશે. જયપુર ગ્રામીણ લોકસભા મતવિસ્તારમાં પીએમની પ્રથમ સભા યોજવાનું કારણ આ સીટ પર રચાઈ રહેલા જાતિ અને પ્રાદેશિક સમીકરણો હોવાનું માનવામાં આવે છે. આ સીટ પર યાદવ, ગુર્જર, જાટ અને એસસી-એસટીની મોટી વોટબેંક છે. આ બેઠક પરથી રાવ રાજેન્દ્ર સિંહ ભાજપ તરફથી ચૂંટણી લડી રહ્યા છે. રાજેન્દ્ર સિંહ ત્રણ વખત ધારાસભ્ય પણ રહી ચૂક્યા છે. 2023માં ધારાસભ્યની ટિકિટ ન મળ્યા પછી પણ તેમણે પાર્ટી માટે મજબૂતીથી કામ કરવાનું ચાલુ રાખ્યું. કોટપુતલી પછી પીએમ 5 એપ્રિલે ચુરુમાં જનસભા કરશે. પહેલા તબક્કામાં પીએમ રાજસ્થાનમાં લગભગ 6 સભાઓ કરી શકે છે.
