વેળાવદર સનેસ પોલીસ ટીમે ભાવનગર-અમદાવાદ નેશનલ હાઇવે ૭૫૧ પરથી વિદેશી દારૂના મોટા જથ્થા સાથે એક આરોપીની ધરપકડ કરી કુલ રૂ. ૯,૯૮,૨૦૦/- નો મુદ્દામાલ જપ્ત કર્યો છે. પોલીસ કોન્સ્ટેબલ લક્કિરાજસિંહને ખાનગી રાહે ચોક્કસ બાતમી મળી હતી કે નેશનલ હાઇવે પરથી દારૂની હેરાફેરી થઈ રહી છે. બાતમીના આધારે પોલીસે હાઇવે પર આવેલી ક્રિષ્ના હોટલ પાસે વ્યુહાત્મક વોચ ગોઠવી હતી. વોચ દરમિયાન શંકાસ્પદ હાલતમાં પસાર થઈ રહેલી અર્ટીકા કારને અટકાવી તેની તલાશી લેતા તેમાંથી ભારતીય બનાવટની ઇંગ્લીશ દારૂની નાની-મોટી કુલ ૫૨૮ નંગ બોટલો મળી આવી હતી, જેની કિંમત રૂ. ૧,૯૩,૨૦૦/- આંકવામાં આવી છે.
પોલીસે ઘટનાસ્થળેથી કાર ચલાવી રહેલા મુખ્ય આરોપી કીશનભાઇ લાલજીભાઇ ચૌહાણ (ઉં.વ. ૨૬, રહે. અક્ષરપાર્ક, ભાવનગર) ની ધરપકડ કરી લીધી છે. જ્યારે દારૂના આ નેટવર્કમાં સામેલ અન્ય ત્રણ આરોપીઓ ઋતુરાજસિંહ ઝાલા (રહે. લીંબડી, સુરેન્દ્રનગર), ગોપાલભાઇ પ્રાગજીભાઇ મકવાણા (રહે. અક્ષરપાર્ક, ભાવનગર) અને દેવ રાઠોડ (રહે. અક્ષરપાર્ક, ભાવનગર)ને પકડવા પોલીસે ચક્રો ગતિમાન કર્યા છે.
વેળાવદર પોલીસે આ સફળ કામગીરી દરમિયાન ઇંગ્લીશ દારૂની બોટલો ઉપરાંત દારૂની હેરફેરમાં ઉપયોગમાં લેવાયેલી અર્ટીકા કાર નંબર: GJ-04-F A 5179 કિંમત રૂ. ૮,૦૦,૦૦૦/- તથા એક મોબાઈલ ફોન કિંમત રૂ. ૫,૦૦૦/- મળી કુલ રૂ. ૯,૯૮,૨૦૦/- નો મુદ્દામાલ કબ્જે કર્યો છે અને પ્રોહીબિશન એક્ટ હેઠળ ગુનો નોંધી આગળની કાર્યવાહી હાથ ધરી છે.
આ સફળ ઓપરેશનને પાર પાડવામાં વેળાવદર પોલીસ સ્ટાફના હેડ કોન્સ્ટેબલ એસ.વી.ગોહિલ, હેડ કોન્સ્ટેબલ અમીતકુમાર ધરમશીભાઇ, હેડ કોન્સ્ટેબલ અનીરુધ્ધસિંહ રામદેવસિંહ તેમજ પોલીસ કોન્સ્ટેબલ લક્કીરાજસિંહ મહાવીરસિંહ અને દિવ્યરાજસિંહ ગંભીરસિંહ સહિતના કર્મચારીઓએ મહત્વની ભૂમિકા ભજવી હતી.
