ભાવનગર જિલ્લાના પાલીતાણા રૂરલ પોલીસ સ્ટેશનના સ્ટાફે બાતમીના આધારે માયઘાર ગામ નજીકથી વિદેશી દારૂ ભરેલી મારૂતિ સુઝુકી અલ્ટો કાર ઝડપી પાડી હતી પોલીસે આ રેડમાં દારૂ, કાર અને મોબાઈલ મળી કુલ રૂ. ૨,૫૦,૯૨૦ નો મુદ્દામાલ જપ્ત કરી ધોરણસરની કાર્યવાહી હાથ ધરી છે.
પાલીતાણા રૂરલ પોલીસ સ્ટાફ પેટ્રોલીંગમાં હતો તે દરમિયાન મળેલી બાતમી મુજબ, માયઘાર ગામ ખાતે શિવ મંદિર પાસે એક સિલ્વર કલરની અલ્ટો કાર (નંબર GJ-04-M-9453) શંકાસ્પદ હાલતમાં ઊભી હતી. પોલીસ ટીમે પંચોની હાજરીમાં ગાડીની તલાશી લેતા પાછળની સીટમાંથી ભારતીય બનાવટની વિદેશી દારૂની ૮ પેટીઓ મળી આવી હતી. જેમાં રોયલ ચેલેન્જ વ્હીસ્કીની કુલ ૯૬ બોટલો (કિંમત રૂ. ૪૯,૯૨૦) મળી આવી હતી.
પોલીસે કારના ચાલક ચંદુભાઈ લાખાભાઈ ડાભી (ઉં.વ. ૩૭, રહે. ગરાજીયા, તા.પાલીતાણા) ને ઝડપી પાડી અટકાયત કરી છે. પૂછપરછ દરમિયાન આ દારૂનો જથ્થો ટીમાણાના અનીિલભાઈ પાસેથી લાવ્યા હોવાનું ખૂલ્યું હતું. પોલીસે દારૂ, કાર અને મોબાઈલ કબજે કરી ચંદુભાઈ ડાભી તથા વોન્ટેડ અનીલભાઈ વિરુદ્ધ પાલીતાણા ગ્રામ્ય પોલીસ સ્ટેશનમાં પ્રોહિબિશન એક્ટની કલમ ૬૫(એ)(ઈ), ૧૧૬(બી), ૮૧, ૯૮(૨) મુજબ ગુનો નોંધી આગળની તપાસ શરૂ કરી છે.
——————————-
