ઇલોન મસ્કે ભારતમાં તેની સેટેલાઇટ ઇન્ટરનેટ સેવા ‘સ્ટારલિંક’ માટે જોરદાર હિમાયત કરી છે. તેમણે કહ્યું છે કે સ્ટારલિંક દ્વારા ભારતના તે દૂરના અને ગ્રામીણ વિસ્તારો સુધી ઇન્ટરનેટ પહોંચાડી શકાય છે, જ્યાં હજુ પણ કનેક્ટિવિટીની મોટી સમસ્યા છે. ઇલોન મસ્કે સોશિયલ મીડિયા પ્લેટફોર્મ X (પહેલા ટ્વિટર) પર ‘DogeDesigner’ની એક પોસ્ટને રીશેર કરતા આ વાત કહી. તેમણે લખ્યું, “સ્ટારલિંક ભારતમાં સૌથી ઓછી સુવિધા મેળવતા લોકો, ખાસ કરીને ગ્રામીણ વિસ્તારોને મદદ કરશે.”
DogeDesignerની પોસ્ટ મુજબ, મે મહિના સુધી ભારતના 11,000થી વધુ લિસ્ટેડ ગામોમાં 4G નેટવર્કની પહોંચ નહોતી.આંકડાઓ અનુસાર, માર્ચ 2026 સુધી ભારતમાં કુલ 1.093 અબજ (109.3 કરોડ) ઇન્ટરનેટ સબ્સ્ક્રિપ્શન હતા. તેમાંથી ગ્રામીણ વિસ્તારોમાં 44.87 કરોડ સબ્સ્ક્રાઇબર્સ હતા.દેશમાં શહેરી અને ગ્રામીણ ઇન્ટરનેટ ડેન્સિટીમાં મોટો તફાવત જોવા મળે છે. આંકડાઓ મુજબ ગ્રામીણ ઇન્ટરનેટ ડેન્સિટી દર 100 લોકોએ માત્ર 48.31 કનેક્શન છે. જયારે શહેરી ઇન્ટરનેટ ડેન્સિટી દર 100 લોકોએ 126.80 કનેક્શન ઉપલબ્ધ છે.
સરકારી યોજના ભારતનેટ હેઠળ દેશભરમાં 8.5 લાખ રૂટ-કિલોમીટરથી વધુ ફાઇબર બિછાવવામાં આવ્યું છે. આના દ્વારા લગભગ 2,21,000 ગ્રામ પંચાયતો (GPs) ને સર્વિસ-રેડી બનાવવામાં આવી છે. જોકે, જૂન 2026 સુધીમાં માત્ર 80,472 ગ્રામ પંચાયતોમાં જ ‘પોઈન્ટ્સ ઓફ પ્રેઝન્સ’ (PoP) કાર્યરત થઈ શક્યા હતા. મસ્કની પોસ્ટમાં કહેવામાં આવ્યું હતું કે સ્ટારલિંક એવી જગ્યાઓ પર કનેક્ટિવિટી આપી શકે છે જ્યાં મુશ્કેલ પહાડી વિસ્તારો, ઓછો કોમર્શિયલ ફાયદો અને ઇન્ફ્રાસ્ટ્રક્ચરનો અભાવ અવરોધરૂપ બને છે. આ ટેકનોલોજી દૂરના ગામડાઓ, પહાડી વિસ્તારો, ટાપુઓ અને આપત્તિગ્રસ્ત વિસ્તારોમાં કનેક્ટિવિટી આપી શકે છે. આ જ કારણોસર માગ કરવામાં આવી છે કે ભારત સરકારે બાકી રહેલી મંજૂરીઓ પૂર્ણ કરીને સ્પેક્ટ્રમ ફાળવવું જોઈએ અને વહેલી તકે સ્ટારલિંકના કોમર્શિયલ લોન્ચનો માર્ગ મોકળો કરવો જોઈએ.સ્ટારલિંક બિઝનેસ ઓપરેશન્સના વાઇસ પ્રેસિડેન્ટ લોરેન ડ્રેયરે કહ્યું,સ્ટારલિંક ભારત સરકાર સાથે સક્રિય અને ફળદાયી વાતચીત કરી રહ્યું છે.”
