બંગાળની ખાડીમાં સર્જાયેલું લૉ પ્રેશર ઝોન હવે વધુ મજબૂત બનીને ઉત્તર-પશ્ચિમ દિશા તરફ આગળ વધી રહ્યું છે. જો આ સિસ્ટમ વધુ ગંભીર રૂપ ધારણ કરશે તો તેને આ વર્ષના પ્રથમ ચક્રવાતી તોફાન ‘અર્નબ’ તરીકે ઓળખવામાં આવશે. હવામાન વિભાગ અને સ્કાઇમેટના પૂર્વાનુમાન મુજબ, આ સંભવિત તોફાન અને હવામાન પ્રણાલીને કારણે દેશના આશરે 8 રાજ્યોમાં 27 સપ્ટેમ્બર સુધી ભારેથી અતિભારે વરસાદની આશંકા વ્યક્ત કરવામાં આવી છે.
હવામાન સંસ્થા સ્કાઇમેટના જણાવ્યા અનુસાર, બંગાળની ખાડીમાં બનેલું નિમ્ન દબાણનું ક્ષેત્ર હવે મધ્ય-પશ્ચિમ બંગાળની ખાડી તરફ પહોંચી ગયું છે. મંગળવારે આ સિસ્ટમ દબાણમાં અને 23 સપ્ટેમ્બર (બુધવાર) સુધીમાં ‘ડીપ ડિપ્રેસન’ એટલે કે ગંભીર દબાણના ક્ષેત્રમાં ફેરવાઈ શકે છે. બુધવારે જ આ સિસ્ટમ ઉત્તર આંધ્રપ્રદેશ અને દક્ષિણ ઓડિશાના દરિયાકાંઠે લેન્ડફોલ કરે તેવી પૂરેપૂરી શક્યતા છે.
આ વાવાઝોડાની સૌથી વધુ સીધી અસર ઉત્તર આંધ્રપ્રદેશ, દક્ષિણ ઓડિશા અને તેલંગાણામાં જોવા મળી શકે છે. આ વિસ્તારોમાં મંગળવારથી જ વાદળછાયું વાતાવરણ અને ભારે વરસાદ શરૂ થઈ ગયો છે. 27 સપ્ટેમ્બર સુધી આ રાજ્યોના નીચાણવાળા વિસ્તારોમાં ભારે વરસાદને કારણે જળબંબાકાર અને પૂર જેવી સ્થિતિ સર્જાવાની ચેતવણી આપવામાં આવી છે. માત્ર તટીય રાજ્યો જ નહીં, પરંતુ આ સિસ્ટમની વ્યાપક અસરને કારણે પૂર્વ ઉત્તર પ્રદેશ, બિહાર, ઝારખંડ, છત્તીસગઢ, મધ્યપ્રદેશના પૂર્વ ભાગો અને મહારાષ્ટ્રના વિદર્ભ વિસ્તારમાં પણ મુસળધાર વરસાદ પડી શકે છે. કેટલાક ગ્રામીણ અને શહેરી વિસ્તારોમાં પૂરનું સંકટ ઊભું થઈ શકે છે.
