મહુવાના દુધેરી ગામમાં રહેતા શખ્સે તેની સાથે મજૂરી કામ કરતી યુવતીને લગ્નની લાલચ આપી એક વર્ષ સુધી અવાર નવાર તેની મરજી વિરુદ્ધ દુષ્કર્મ કરી ગર્ભ રાખી દેતા ભોગગ્રસ્ત યુવતીએ મહુવા પોલીસ મથકમાં શખ્સ વિરુદ્ધ ફરિયાદ નોંધાવી છે.
આ બનાવ અંગે મળતી વિગતો મુજબ મહુવાના દુધેરી ગામમાં રહેતા અને મહુવાની નેસવડ ચોકડી પાસે આવેલ ફૂડઝના કારખાનામાં કામ કરતા મહેશ નારણભાઇ શિયાળે કારખાનામાં તેની સાથે મજૂરી કામ કરતી યુવતી સાથે પ્રેમ સંબંધ બાંધી તેની સાથે લગ્ન કરવાની લાલચ આપી યુવતીની મરજી વિરુદ્ધ કારખાનામાં અને અલગ અલગ જગ્યાએ લઈ જઈ અવાર નવાર દુષ્કર્મ કર્યું હતું,જેમાં યુવતીને બે માસનો ગર્ભ રહી જતા તેણે મહેશને લગ્ન કરી લેવા દબાણ કર્યું હતું.
લગ્નની વાતને લઈને યુવક યુવતીના ઘરે મળવા આવ્યો હતો અને યુવતીને પોતાની સાથે પોતાના ઘરે લઈ જઈ ત્યાં પણ તેની સાથે દુષ્કર્મ કર્યું હતું અને બીજા દિવસે તેની ફુઈના ઘરે મૂકી જઈ લગ્ન કરવાની ના પાડી હતી.
આ અંગે ભોગગ્રસ્ત યુવતીએ મહુવા પોલીસ મથકમાં ફરિયાદ નોંધાવતા મહુવા પોલીસે શખ્સ વિરુદ્ધ ગુનો નોંધી તપાસ હાથ ધરી છે.
