ગુરુવારે યુએસ સેનાએ ઉત્તરપશ્ચિમ સીરિયામાં હવાઈ હુમલામાં અલ-કાયદા સાથે જોડાયેલા આતંકવાદી સંગઠનના વરિષ્ઠ આતંકવાદી મોહમ્મદ સલાહ અલ-જબીરને મારી નાખ્યો. યુએસ સેન્ટ્રલ કમાન્ડે એક નિવેદન જારી કરીને કહ્યું કે આ હવાઈ હુમલો આતંકવાદી જૂથોનો નાશ કરવા અને તેમની પ્રવૃત્તિઓને વિક્ષેપિત કરવાના પ્રયાસોનો એક ભાગ હતો. જબીર અલ-કાયદાના સહયોગી હુર્રાસ અલ-દિન નામના જૂથ સાથે સંકળાયેલો હતો.
દરમિયાન, પેલેસ્ટિનિયન આતંકવાદી જૂથ હમાસે ગુરુવારે ઇઝરાયેલી હવાઈ હુમલામાં તેના લશ્કરી વડા મોહમ્મદ દેઈફના મૃત્યુની પુષ્ટિ કરી. ઇઝરાયેલ ડિફેન્સ ફોર્સિસ (IDF) દ્વારા તેની જાહેરાત કર્યાના મહિનાઓ પછી આ પુષ્ટિ મળી. ટાઇમ્સ ઓફ ઇઝરાયે અનુસાર, હમાસના પ્રવક્તા અબુ ઓબેદાએ એક વીડિયો નિવેદનમાં દેઇફના મૃત્યુની પુષ્ટિ કરી. ઇઝરાયેલે ઓગસ્ટ 2023 માં જાહેરાત કરી હતી કે તેણે 13 જુલાઈના રોજ ખાન યુનિસ વિસ્તારમાં હવાઈ હુમલામાં મોહમ્મદ દેઈફને મારી નાખ્યો હતો.
7 ઓક્ટોબર, 2023 ના રોજ, હમાસે દક્ષિણ ઇઝરાયેલ પર હુમલો કર્યો, જેમાં 1,200 થી વધુ લોકો માર્યા ગયા. તેમાંના મોટાભાગના નાગરિકો હતા. 200 થી વધુ લોકોનું અપહરણ કરવામાં આવ્યું હતું. ત્યારબાદ ઇઝરાયેલે હમાસ સામે બદલો લીધો, જેમાં ગાઝામાં 46,000 થી વધુ પેલેસ્ટિનિયનોની હત્યા કરવામાં આવી.
તાજેતરમાં ગાઝામાં ઇઝરાયેલ અને હમાસ વચ્ચે યુદ્ધવિરામ પર સંમતિ સધાઈ હતી. આ કરાર હેઠળ, બંધકો અને કેદીઓનું વિનિમય થયું છે. ગુરુવારે, હમાસે ઇઝરાયેલમાંથી 110 પેલેસ્ટિનિયન કેદીઓના બદલામાં આઠ બંધકોને મુક્ત કર્યા. આમાં 5 થાઈ કૃષિ કામદારો અને 3 જર્મન-ઇઝરાયલી નાગરિકોનો સમાવેશ થાય છે.
