ટ્રમ્પ અને મોદી વચ્ચે 13 ફેબ્રુઆરીએ મુલાકાત : સૂત્રો

ડોનાલ્ડ ટ્રમ્પના શપથ ગ્રહણ સમારોહ પછી અમેરિકન રાષ્ટ્રપતિ અને ભારતના વડાપ્રધાન નરેન્દ્ર મોદી વચ્ચેની મુલાકાત અંગે અટકળો લગાવવામાં આવી રહી છે. સૂત્રોનું કહેવું છે કે ટ્રમ્પ અને મોદી 13 ફેબ્રુઆરીએ મળી શકે છે. અહેવાલો અનુસાર, વડાપ્રધાન નરેન્દ્ર મોદી 13 ફેબ્રુઆરીએ અમેરિકાની મુલાકાત દરમિયાન વોશિંગ્ટનમાં અમેરિકાના રાષ્ટ્રપતિ ડોનાલ્ડ ટ્રમ્પને મળશે. બંને દેશો વચ્ચે ચાલી રહેલી વેપાર વાટાઘાટો અને સંરક્ષણ અને ટેકનોલોજી સહયોગ પર ચર્ચાઓ વચ્ચે આ બેઠક થવાની અપેક્ષા છે.
તાજેતરમાં પીએમ મોદીએ ટ્રમ્પ સાથે ફોન પર વાતચીત કરી હતી. પીએમએ સોશિયલ મીડિયા હેન્ડલ X પર આ અંગે માહિતી આપી હતી. ઇન્સ્ટાગ્રામ પર એક પોસ્ટમાં, પીએમ મોદીએ કહ્યું: “મારા મિત્ર રાષ્ટ્રપતિ ડોનાલ્ડ ટ્રમ્પ સાથે વાત કરવાનો આનંદ થયો. તેમના ઐતિહાસિક બીજા કાર્યકાળ બદલ તેમને અભિનંદન. અમે પરસ્પર લાભદાયી અને વિશ્વસનીય ભાગીદારી માટે પ્રતિબદ્ધ છીએ. તેમણે કહ્યું, ‘આપણે આપણા લોકોના કલ્યાણ અને વૈશ્વિક શાંતિ, સમૃદ્ધિ અને સુરક્ષા માટે સાથે મળીને કામ કરીશું.’
અગાઉ, 7 નવેમ્બરના રોજ રાષ્ટ્રપતિની ચૂંટણી જીત્યા પછી તરત જ પીએમ નરેન્દ્ર મોદીએ ટ્રમ્પ સાથે વાત કરી હતી. વાતચીત દરમિયાન ટ્રમ્પે પીએમ મોદીની પ્રશંસા કરી અને તેમને ‘અદ્ભુત વ્યક્તિ’ ગણાવ્યા અને કહ્યું કે ‘આખી દુનિયા તેમને પ્રેમ કરે છે’. ઉલ્લેખનીય છે કે અમેરિકાના રાષ્ટ્રપતિ ડોનાલ્ડ ટ્રમ્પના શપથ ગ્રહણ સમારોહમાં વિદેશ મંત્રી એસ. જયશંકરે વડાપ્રધાન મોદીનું પ્રતિનિધિત્વ કર્યું હતું. જયશંકરે ખાસ દૂત તરીકે ભાગ લીધો હતો. તેમણે ટ્રમ્પને વડા પ્રધાન મોદીનો એક ખાસ પત્ર પણ સોંપ્યો.