ભાવનગર એલ.સી.બી. પોલીસ સ્ટાફે ઉમરાળા પોલીસ સ્ટેશન વિસ્તારમાં પેટ્રોલિંગ દરમિયાન એક મોટા ગેરકાયદેસર ફ્યુલ વેચાણ કૌભાંડનો પર્દાફાશ કર્યો છે. પોલીસને બાતમી મળી હતી કે ભાવનગર-રાજકોટ હાઈવે પર ધરવાળા ગામના પાટિયા પાસે આવેલા ‘દેવ ઓટો ગેરેજ એન્ડ સર્વિસ સ્ટેશન’ના કમ્પાઉન્ડમાં એસ્સાર કંપનીના નામે ડિસપેન્સર યુનિટ લગાવી, ભૂગર્ભ ટાંકામાં પેટ્રોલ-ડીઝલ સિવાયનું જ્વલનશીલ પ્રવાહી વેચી આર્થિક કૌભાંડ આચરવામાં આવી રહ્યું છે.
પોલીસે દરોડો પાડી સ્થળ પરથી જગદિશભાઇ ગીરધરભાઇ કાકડીયા (ઉ.વ.૩૨, રહે. સુરત, મૂળ અમરેલી) નામના ઇસમની અટકાયત કરી છે. પોલીસે સ્થળ પરથી રૂ.૯૦,૦૦૦ની કિંમતનું એસ્સારનું ડિસપેન્સર યુનિટ, રૂ.૨૫,૦૦૦નું અન્ય એક બંધ યુનિટ અને ટાંકામાંથી રૂ.૯,૫૨,૩૦૮ની કિંમતનું ૧૧,૩૩૭ લીટર જ્વલનશીલ પ્રવાહી મળી કુલ રૂ.૧૦,૬૭,૩૦૮નો મુદ્દામાલ જપ્ત કર્યો છે. ઉમરાળા પોલીસ મથકે જાણવાજોગ નોંધ કરી આગળની કાર્યવાહી હાથ ધરાઈ છે.
