ભાવનગરના એરપોર્ટ વિસ્તારમાં આવેલી એક ખાનગી કંપનીની કન્સ્ટ્રક્શન સાઈટ પર વન્યજીવ સંરક્ષણ કાયદાના ઉલ્લંઘનની ચોંકાવનારી ઘટના સામે આવી છે, જેમાં ફોરેસ્ટ વિભાગે દરોડો પાડીને દુર્લભ પ્રજાતિના કાચબાનું ભોજન માણતા ચાર પરપ્રાંતીય મજૂરોને ઝડપી પાડ્યા છે. આર.એફ.ઓ. ભરત ગલાણીના જણાવ્યા મુજબ, બાતમીના આધારે ફોરેસ્ટ અને એફ.એસ.એલ. (FSL) ની ટીમે સંયુક્ત રેડ કરીને વન્યજીવ સંરક્ષણ અધિનિયમ હેઠળ ‘શેડ્યુલ-૧’ માં આવતા પ્રતિબંધિત કાચબાનું રાંધેલું શાક, કાપકૂટ માટે વપરાયેલું ચપ્પુ અને અન્ય પુરાવા કબજે કર્યા છે. વન વિભાગે સ્થળ પરથી ૪ થી ૫ જેટલા અલગ-અલગ સેમ્પલ એકત્રિત કરી વૈજ્ઞાનિક પરીક્ષણ માટે એફ.એસ.એલ.માં મોકલી આપ્યા છે.
આ ગંભીર ગુના બદલ વન્યજીવ સંરક્ષણ અધિનિયમ-૧૭૨ ની વિવિધ કલમો અને ગુના નંબર ૦૩/૨૦૨૬-૨૭ અંતર્ગત બિહારના સમસ્તીપુર જિલ્લાના વતની એવા ચાર આરોપીઓ વિજયકુમાર મણિલાલ મહતો (ઉ.વ. ૪૨), આનંદકુમાર રામલખન મહતો (ઉ.વ. ૩૯), રામપુકાર દોરીક પાસવાન (ઉ.વ. ૪૨) અને રવિન લુખો પાસવાન (ઉ.વ. ૨૯) ની અટકાયત કરવામાં આવી છે. આ ગુનામાં ૩ થી ૭ વર્ષ સુધીની જેલની સજાની જોગવાઈ હોવાથી કડક કાર્યવાહી હાથ ધરાઈ છે. હાલ સરકારની પ્રવર્તમાન ગાઈડલાઈન અનુસાર તમામ તહોમતદારોનું સઘન મેડિકલ ચેકઅપ કરાવી, તેઓના ગુનાહિત ઇતિહાસ અંગે પૂછપરછ હાથ ધરી કોર્ટમાં રજૂ કરવાની તજવીજ ચાલી રહી છે.
