ગુજરાત સરકારના “નશા મુક્ત ગુજરાત” અને જિલ્લા પોલીસના “NO DRUGS IN BHAVNAGAR” અભિયાન હેઠળ વેળાવદર (ભાલ) પોલીસે મોટી સફળતા મેળવી છે. યુવાધનને નશાના રવાડે ચઢાવતા અને ડોક્ટરના પ્રિસ્ક્રિપ્શન વિના ગેરકાયદેસર રીતે વેચાતા નશાકારક ડ્રગ્સ તથા સિરપના કાળાબજાર પર ભાવનગર પોલીસે લાલ આંખ કરી છે. જેમાં કફસિરપની બોટલોના જથ્થા સાથે એક શખ્સને ઝડપી લીધો હતો.
વેળાવદર પોલીસ કોન્સ્ટેબલને મળેલી ચોક્કસ બાતમીના આધારે, વેળાવદર (સનેસ) પોલીસની ટીમે નીરમા ચોકડી (સનેસ ચોકડી) પાસેથી એક શખ્સને અટકાવી પૂછપરછ કરતા તે શંભુભાઈ વાસુરભાઈ ચુડાસમા (ઉ.વ. ૨૨, વ્યવસાય: હીરા ઘસવાનો, રહે. ચીત્રા, ભાવનગર) વાળો હોવાનું જણાવેલ તેની તલાશી લેતા તેની પાસેથી નશાકારક કફ સિરપ (TRIPROLIDINE HYDROCHLORIDE AND CODEINE PHOSPHATE COUGH LINCTUS ANAREX T) ની બિનઅધિકૃત ૨૪૦ બોટલ (કિંમત રૂ. ૪૭,૫૨૦) મળી આવી હતી. પોલીસે સિરપ, બાઈક સહિત કુલ રૂ. ૧,૦૭,૫૨૦નો મુદ્દામાલ જપ્ત કરી NDPS એક્ટની કલમ ૮(સી), ૨૧(સી), અને ૨૯ હેઠળ કડક કાર્યવાહી હાથ ધરી છે.જયારે આમ સંડોવાયેલ અન્ય શખ્સ નાગજીભાઈ કાનજીભાઈ ચુડાસમા (રહે. કુંભારવાડા, ભાવનગર) ફરાર છે તેને પકડવા પોલીસે તપાસ હાથ ધરી છે. આ ઉપરાંતઆ નેટવર્કમાં અન્ય કોણ સંડોવાયેલું છે તેની ઊંડાણપૂર્વક તપાસ શરૂ કરી છે.
