ભાવનગર જિલ્લાના બગદાણા પોલીસની ટીમે બાતમીના આધારે મહુવા તાલુકાના નાના ખુટવડા ગામે દરોડો પાડી રહેણાંક મકાનમાંથી વિદેશી દારૂનો મોટો જથ્થો ઝડપી પાડ્યો છે. પોલીસે સ્થળ પરથી 109 બોટલ સાથે એક શખ્સની અટકાયત કરી હતી જ્યારે દારૂ સપ્લાય કરનાર અન્ય એક આરોપી વિરુદ્ધ ગુનો નોંધી તપાસ હાથ ધરી છે.
બગદાણા પોલીસ સ્ટેશનનો સ્ટાફ પેટ્રોલીંગમાં હતો. તે દરમિયાન બાતમી મળી હતી કે નાના ખુટવડા ગામે પ્રાથમિક શાળા પાછળ રહેતો હરેશભાઈ અરજણભાઈ ગોહિલ ઉ.વ.23 પોતાના ફળિયામાં જુવારના ઢગલામાં વિદેશી દારૂ સંતાડીને તેનું વેચાણ કરે છે. બાતમીવાળી જગ્યાએ પોલીસે પંચોને સાથે રાખી રેડ કરી હતી. તપાસ દરમિયાન જુવારના ઢગલામાંથી મધ્યપ્રદેશ અને ગોવા પાસિંગની ‘પોલેન્ડ પ્રાઇડ ઓરેન્જ વોડકા’ની 55 અને ‘નેશનલ ઓરેન્જ વોડકા’ની 54 મળી કુલ 109 નાની બોટલ કી.રૂ.15,260) મળી આવી હતી.
પોલીસે દારૂનો જથ્થો અને 5,000 ની કિંમતનો એક મોબાઇલ મળી કુલ રૂ.20,260 નો મુદ્દામાલ કબજે કર્યો હતો. આરોપીની પૂછપરછમાં આ દારૂ ઓથા ગામના ઉદય ઉર્ફે રોયલ સોલંકીએ આપ્યો હોવાની કબૂલાત કરતા પોલીસે બંને આરોપીઓ સામે પ્રોહિબિશન એક્ટની કલમ 65-A, 116-B અને 81 મુજબ ગુનો નોંધી કાયદેસરની કાર્યવાહી હાથ ધરી છે.
