જૂની અદાવતમાં ફિલ્મી ઢબે કારનો પીછો કરી જાનથી મારી નાખવાની ધમકી આપી

ભાવનગર જિલ્લાના તળાજા તાલુકાના નાની માંડવાળી ગામે રહેતા અને ખેતી કરતા હરપાલભાઈ પ્રવીણભાઈ બાટી (ગઢવી) ગત તા. ૨૩ જુલાઈના રોજ પોતાના નાના ભાઈ સિદ્ધરાજ સાથે કારમાં વરલ ગામે દરણું દળાવવા જઈ રહ્યા હતા. આ દરમિયાન સાંજના સુમારે વરલ રોડ પર કાળભૈરવ આશ્રમ પાસે નાની માંડવાળીના જ હર્ષદદાન નાનાભાઈ બાટીએ પોતાની સફેદ બ્રેઝા કાર તેમની કાર સામે અચાનક ઊભી રાખી દીધી હતી. હર્ષદદાન હાથમાં લાકડાનો ધોકો લઈને નીચે ઉતરતાં બંને ભાઈઓ ગભરાઈને કાર લઈને ભાગ્યા હતા.
જોકે, આરોપીએ ફિલ્મી ઢબે કારનો પીછો કરી થોડે દૂર તેમને આંતર્યા હતા અને બિભત્સ ગાળો ભાંડી હતી. આરોપીએ “મારી વિરુદ્ધ અગાઉ કરેલ ફરિયાદ પાછી ખેંચી લેજે, નહીંતર તને જીવતો નહીં રહેવા દઉં” તેવી જાનથી મારી નાખવાની ધમકી આપી હતી. આ ઘટનાથી ડરી ગયેલા હરપાલભાઈએ તુરંત ૧૧૨ હેલ્પલાઈન પર જાણ કરી હતી અને સિહોર પોલીસ મથકે દોડી ગયા હતા. હાલ ભોગ બનનારની ફરિયાદના આધારે પોલીસે હર્ષદદાન બાટી વિરુદ્ધ બી.એન.એસ. કલમ ૩૫૨ અને ૩૫૧(૩) મુજબ ગુનો દાખલ કરી કાયદેસરની કાર્યવાહી હાથ ધરી છે.