રાંચીમાં વિદ્યાર્થી આંદોલને ઉગ્ર સ્વરૂપ ધારણ કર્યું છે. આજે સવારે મોટી સંખ્યામાં વિદ્યાર્થીઓ વિધાનસભાનો ઘેરાવ કરવા નીકળ્યા હતા, જ્યાં 6 સ્તરની સુરક્ષા ગોઠવવામાં આવી હતી. ભાજપના પ્રદેશ પ્રમુખ આદિત્ય સાહૂ સહિત અનેક નેતાઓની પોલીસે અટકાયત કરી. સરકારે મોટાભાગની માંગણીઓ સ્વીકારવાનો દાવો કર્યો છે, પરંતુ CBI તપાસનો મુદ્દો હજુ પણ વણઉકેલ્યો છે.
ઝારખંડના રાંચીમાં લાંબા સમયથી ચાલી રહેલા વિદ્યાર્થી આંદોલને આજે ઉગ્ર રૂપ ધારણ કર્યું છે. આજે સવારથી જ વિદ્યાર્થીઓ મોટી સંખ્યામાં વિધાનસભાનો ઘેરાવ કરવા માટે નીકળી પડ્યા છે. આંદોલનને જોતાં વિધાનસભાની ચારેય તરફ લોખંડી સુરક્ષા વ્યવસ્થા ગોઠવી દેવામાં આવી હતી. જોકે વિદ્યાર્થીઓએ કેટલાક બેરિકેડ ઓળંગીને વિધાનસભા તરફ કૂચ કરી રહ્યા છે.
ભારતીય જનતા પાર્ટીના નેતાઓની અટકાયત
બીજી તરફ ભારતીય જનતા પાર્ટીના નેતાઓ પણ આજે જ ધરણાં પર બેઠા હતા. ભારે સંખ્યામાં પોલીસ ફોર્સ તૈનાત કરીને ભાજપના પ્રદેશ પ્રમુખ આદિત્ય સાહૂ સહિત અનેક વરિષ્ઠ નેતાઓની અટકાયત કરવામાં આવી છે. રાંચીના SPએ પોલીસ જવાનોને ધીરજ રાખવા પણ હાંકલ કરી છે. જેથી જંતર મંતર જેવી સ્થિતિનું નિર્માણ ન થાય. પોલીસે વિદ્યાર્થીઓને શાંતિપૂર્ણ રીતે કૂચ કરવાની પણ અપીલ કરી છે. પોલીસની તૈયારી છે કે વિધાનસભા તરફ કૂચ કરી રહેલા વિદ્યાર્થીઓને ફરીથી ધરણાં સ્થળ તરફ લઈ જવામાં આવે. વિદ્યાર્થીઓ વિધાનસભા તરફ કૂચ કરી રહ્યા છે ત્યારે ત્યાં સુધીના રસ્તામાં પોલીસે 6 જગ્યાએ બેરિકેડિંગ કર્યું છે. લાંબા સમયથી વિદ્યાર્થીઓની માંગ સાથે ઉપવાસ કરી રહેલા દેવેન્દ્ર મહતો પણ ઍમ્બ્યુલન્સમાં સવાર થઈને વિધાનસભા તરફ રવાના થઈ ગયા છે.
અમે મોટા ભાગની માંગણી સ્વીકારી: ઝારખંડ સરકાર
ઝારખંડના CM હેમંત સોરેનની સરકારના મંત્રી યોગેન્દ્ર પ્રસાદે આરોપ લગાવ્યો છે કે, વિદ્યાર્થીઓના આંદોલનમાં ભારતીય જનતા પાર્ટી પડદાં પાછળથી બેટિંગ કરી રહી છે. ભારતીય જનતા પાર્ટી વિદ્યાર્થીઓના આંદોલનને હાઈજેક કરવા માંગે છે. ઝારખંડના અન્ય એક મંત્રી સુદિવ્ય સોનુએ કહ્યું છે કે, સરકારે હાઈ લેવલ સમિતિ બનાવીને વિદ્યાર્થીઓ સાથે સંવાદ કરી રહી છે. તેમની મોટા ભાગની માંગ સ્વીકારી લેવામાં આવી છે.
