વૃદ્ધ મહિલા ઉપર ટોળાએ હુમલો કરી ઘરમાં આગ લગાડી

ભાવનગરમાં કુંભારવાડા અક્ષરપાર્ક સોસાયટી, વાદિલાના નાળા પાસે આવેલ મફતનગરમાં રહેતી વૃદ્ધ મહિલા ઉપર ટોળાએ હુમલો કરી ઘરમાં આગ લગાડી દેતા બોરતળાવ પોલીસ કાફલો દોડી ગયો હતો અને આઠ શખ્સ વિરોધ ગુનો નોંધી કાર્યવાહી હાથ ધરી હતી.
આ બનાવ અંગે મળતી વિગતો મુજબ શહેરના અક્ષરપાર્ક, વાદીલાના નાળા પાસે આવેલ વૃદ્ધ મહિલા કમુબેન ભુપતભાઈ માથાસૂરિયાના ઘર પાસે ભોળાભાઈ નામનો વ્યક્તિ આટાફેરા મારતો હોય કમુબેને તેને ટોકતા તેને ફોન કરી અન્ય માણસોને બોલાવતા રાજુ બાબુ, જગદીશ ધીરુ, રાજુભાઈના બે દીકરા, ચકાભાઇ, જાેન્ટીભાઈ, સંજયભાઈ સહિતના દોડી આવ્યા હતા અને કમુબેન ઉપર લાકડી વડે હુમલો કરી ઢીકા પાટુનો માર મારી ઘરના બાજુના રૂમમાં આવેલ મઢમાં પેટ્રોલ છાંટી આગ લગાડી દીધી હતી.
દરમિયાન કમુબેનની દીકરીએ પોલીસને ફોન કરતા બોરતળાવ પોલીસ કાફલો બનાવ સ્થળે દોડી ગયો હતો.હુમલાની ઘટનામાં ઇજાગ્રસ્ત કમુબેનને સારવાર અર્થે ૧૦૮ એમ્બ્યુલન્સ મારફત હોસ્પિટલ ખસેડવામાં આવ્યા હતા.
આ બનાવ અંગે કમુબેને આઠ શખ્સ વિરુદ્ધ ફરિયાદ નોંધાવતા બોરતળાવ પોલીસે તપાસ હાથ ધરી છે.