એફ.વાય. બીકોમ પાસ યુવક પારિવારિક જવાબદારીને કારણે પાલિકામાં સફાઈ કર્મીની નોકરી મેળવવામાં પોલીસના સકંજામાં ભેરવાયો હતો. તેણે બાંયધરીપત્રકમાં ઘો-7 અભ્યાસ બતાવ્યો હતો. નનામી અરજીના આધારે પાલિકાની વિજિલન્સની ટીમને 3 વર્ષે ખબર પડી હતી. આ કર્મચારીને નોકરીમાંથી મે-2022માં ડિસમિસ કરાયો હતો. હવે આ કેસમાં પાલિકાએ ફરિયાદ નોંધવતા પોલીસે પ્રદીપ વિનોદ કાકલીયાની ઠગાઈમાં ધરપકડ કરી છે.
આરોપી પ્રદીપ કાકલીયાએ આ મુદ્દે કહ્યું હતું કે, ‘મેં ક્યાં કલેકટરની નોકરી માંગી હતી. મેં તો ઝાડું મારવાની નોકરી માંગી હતી ને. તેમાં પણ હું 7 પાસ થયો હતો એટલે બતાવ્યું. બાકી મેં કોઈ ખોટા ડોક્યુમેન્ટ બનાવ્યા નથી.
ઘો-10 અને ઘો-12 પાસને ક્યાં નોકરી મળે છે. મારે 3 દીકરી, માતા-પિતા સહિત 7 જણાનું ભરણપોષણ કરવાનું છે. આટલું ભણ્યા પછી પણ નોકરી મળતી નથી, શું કરીએ? 2019માં પાલિકામાં સફાઇ-કામદાર તરીકે લાગ્યો ત્યારે પહેલા વર્ષ 7500 પગાર હતો. વર્ષ 2020માં કોરોનામાં 8500 અને 2021માં 9500ના માસિક પગારમાં મેં મારો જીવ જોખમમાં મુકી કોરોનાની કામગીરી કરી હતી, જેમાં આરોગ્ય અધિકારી આશિષ નાયકના હસ્તે બેસ્ટ કર્મચારીનો એવોર્ડ પણ મળ્યો હતો. મને પાલિકાએ વર્ષ 2022માં મે મહિનામાં ડિસમિસ કરી દીધો હતો. મારે ઘર ચલાવવું મુશ્કેલ છે. નોકરી મળતી નથી એટલે મજબૂરીમાં ઝાડું મારવાની નોકરી કરવી પડે છે.
