ભાવનગરના અનંતવાડી વિસ્તારમાં આવેલ રમાબાગ ખાતે રહેતા અને બંદર રોડ પર ફેક્ટરી ધરાવતા આઘેડ ઘરે જમવા માટે હતા હતા ત્યારે બે શખ્સોએ તેમની કાર ઊભી રખાવી છરી બતાવી કારને નુકશાન કર્યું છે તેમ કહી રૂ.૨૫ લાખની માંગણી કરી હતી. આ ઉપરાંત આઘેડ ઘરે ગયા ત્યારે પણ તેમના મોબાઈલ ફોનમાં ધમકી આપી રૂ ૨૫ લાખની માંગણી કરતા નિલમબાગ પોલીસે બે શખ્સ વિરુદ્ધ ગુનો નોંધી તપાસ હાથ ધરી છે.
આ બનાવ અંગે પ્રાપ્ત વિગતો અનુસાર શહેરના અનંતવાડી વિસ્તારમાં આવેલ રમાબાગ ખાતે રહેતા અને ભારત એસબેસ્ટસ સિમેન્ટ પ્રોડક્ટ નામથી મેગ્નેશિયમ કાર્બોનેટની બનાવટો બનાવવાની ફેકટરી ચલાવતા પ્રવીણભાઈ કણસાગરાએ નીલમબાગ પોલીસ મથકમાં એવા મતલબની ફરિયાદ નોંધાવી હતી કે, ગઈ કાલે બપોરના તેઓ તેમની કાર લઈને ફેક્ટરીએથી ઘરે જામવા માટે જતા હતા ત્યારે રેલવે સ્ટેશનના ગેટ પાસે પહોંચ્યા ત્યારે કાર નં. જી.જે. ૦૩- ડી.જે.- ૩૦૯૧ તેમની પાસે આવીને ઊભી રહી હતી અને કારમાંથી અજાણ્યા માણસે ઉતરી કારના કાચ ખીલવાનું કહી પ્રવીણભાઈને કહેલ કે હું મોબીન નિલેશ ભોપાનો માણસ છું અને મર્ડર ખાઈ ગયેલી છું.અમારી ગાડીને નુકશાન કરેલ છે. તારે પૈસા આપવા પડશે તેમ કહી કારમાંથી બે મોટા છરા સાથે ઉતરેલા બે શખ્સોએ ૨૫ લાખ આપવા પડશે તેમ કહેતા પ્રવીણભાઈ પોતાની કાર લઈને ઘરે જતા રહ્યા હતા.
પ્રવીણભાઈ ઘરે પહોંચ્યા ત્યારે તેમના મોબાઈલ પર ફોન કરીને ધમકી આપી ફરી ૨૫ લાખની માંગણી કરતા પ્રવીણભાઈએ ફોન કાપી નાખ્યો હતો અને નિલમબાગ પોલીસ મથકમાં પ્રવીણભાઈએ મોબિન અને અજાણ્યા શખ્સ વિરુદ્ધ ફરિયાદ નોંધાવી હતી.
નિલમબાગ પોલીસે બન્ને શખ્સ વિરુદ્ધ આઇ.પી.સી. ૩૮૭,૩૪૧,૫૦૬(૨),૧૧૪ અને જીપીએ ૧૩૫ મુજબ ગુનો નોંધી તપાસ હાથ ધરી છે.
