નમામિ દેવી નર્મદે : સરદાર સરોવર ડેમ સંપૂર્ણ ભરાયો

ગુજરાતની જીવાદોરી ગણાતો સરદાર સરોવર ડેમ છેલ્લા કેટલા સમયથી છલકાવાની પરિસ્થિતિમાં હતો ત્યારે આજે ડેમ પોતાની મહત્તમ સપાટી 138.68 મીટરે પહોંચ્યો છે. સિઝનમાં પહેલીવાર ડેમ છલોછલ ભરાતાં મુખ્યમંત્રી દ્વારા નર્મદાનાં નીરનાં વધામણાં કરવામાં આવશે. ઉલ્લેખનીય છે કે, આ ચોમાસાની સિઝનમાં ડેમના દરવાજા 33 અલગ અલગ દિવસો પર ખોલીને કુલ 77 લાખ 39 હજાર 786 ક્યૂસેક પાણી છોડવામાં આવ્યું હતું.
સરદાર સરોવર ડેમ પૂર્ણ સપાટી 138.68 મીટર સુધી છલોછલો ભરાયો છે. ડેમમાં હાલ 82,408 ક્યૂસેક પાણીની આવક છે. ડેમમાંથી હાલ 5 હજાર ક્યુસેક પાણી નદીમાં છોડવામાં આવી રહ્યું છે. ડેમમાંથી મુખ્ય કેનાલમાં 4364 ક્યૂસેક પાણી છોડવામાં આવી રહ્યું છે. ટર્બાઇન મારફતે 40,930 ક્યૂસેક પાણીની જાવક છે. રાજ્યના મુખ્યમંત્રી ભૂપેન્દ્ર પટેલ આજે નર્મદા ડેમ પર 12.39 વાગે પહોંચીને બ્રાહ્મણો દ્વારા મંત્ર ઉચ્ચારણો સાથે નર્મદા નદીના નીરને ચૂંદડી, શ્રીફળ, કંકુ ચોખા અર્પણ કરીને પૂજા કરશે. નર્મદા નીરના વધામણાં કરશે અને નર્મદા મૈયાની આરતી કરશે.