ભુજ ફેમિલી કોર્ટ દ્વારા ભરણપોષણના કેસમાં સજા પામેલા અને છેલ્લા ઘણા સમયથી પોલીસ પકડથી દૂર રહેલા એક આરોપીને ગઢડા પોલીસે બાતમીના આધારે ઝડપી પાડ્યો છે.બોટાદ SP ધર્મેન્દ્ર શર્માની સજા વોરંટની બજવણી કરવાની કડક સૂચનાથી ગઢડા પોલીસ દ્વારા આ કામગીરી કરવામાં આવી હતી. આરોપી વિજયભાઈ ધનજીભાઈ ચાવડા (રહે. પડવદર, તા. ગઢડા) ભુજની ફેમિલી કોર્ટના બે અલગ-અલગ કેસમાં વોન્ટેડ હતો.
તેને ભરણપોષણ પેટે અનુક્રમે રૂ.72,000 અને રૂ.97,000 ની રકમ ન ચૂકવવા બદલ ગત 04/02/2026 ના રોજ કોર્ટે અનુક્રમે 180 દિવસ અને 240 દિવસની સાદી કેદની સજા ફટકારી હતી. પોતાની ધરપકડ ટાળવા તે લાંબા સમયથી ભાગતો ફરતો હતો. આખરે ગઢડા પોલીસે તેને ઝડપી પાડી, ભુજની પાલારા ખાસ જેલ ખાતે મોકલી આપવા કાયદેસરની કાર્યવાહી હાથ ધરી છે.
