ભાવનગર જિલ્લાના મોડેલ ગામ હણોલ ખાતેરવિવારે ‘ફિટ ઈન્ડિયા–સન્ડેઝ ઑન સાયકલ’ની ૮૫મોં ઉપક્રમ યોજાયો. કેન્દ્રીય યુવા બાબતો અને રમતગમત તથા શ્રમ અને રોજગાર મંત્રી ડૉ. મનસુખ માંડવિયાના નેતૃત્વમાં તેમના પૈતૃક ગામ હણોલના અમૃત સરોવર નજીક આ કાર્યક્રમ ‘નશા મુક્ત ભારત અભિયાન’ની થીમ હેઠળ યોજાયો હતો. આ પહલ પ્રધાનમંત્રી નરેન્દ્ર મોદી દ્વારા શરૂ કરાયેલા ‘નશા મુક્ત યુવા ફોર વિકસિત ભારત સંકલ્પ અભિયાન’ને સીધો વેગ આપે છે.
સવારની શરૂઆત ફિલ્મી ગીતો પર ઉત્સાહવર્ધક ડાન્સ અને ટ્રેડિશનલ ગરબાથી થઈ હતી. ત્યારબાદ ડૉ. મનસુખ માંડવિયાએ ઉપસ્થિત સૌને નશા વિરોધી શપથ લેવડાવી હતી અને તેમની આગેવાનીમાં સાયકલ રાઈડનો પ્રારંભ થયો હતો. માય ભારત વોલન્ટિયર્સ, NSS સભ્યો, સાયકલિંગ પ્રેમીઓ અને ગ્રામજનોએ ગામના હરિયાળા વાતાવરણ વચ્ચે ૬.૨ કિલોમીટરની સાયકલ રાઈડ પૂર્ણ કરી હતી. તે સિવાય વોલીબોલ, ચેસ, કેરમ અને બેડમિન્ટન જેવા સ્પોર્ટ્સ સાથેનું આકર્ષક ગેમ ઝોન પણ ઊભું કરાયું હતું.
સાયકલિંગ બાદ ડૉ. મનસુખ માંડવિયાએ જણાવ્યું કે, ‘સન્ડેઝ ઑન સાયકલ’ હવે ગ્રામીણ સ્તરે પહોંચીને એક સશક્ત જનઆંદોલન બની ગયું છે. દેશભરમાં ૧૮,૦૦૦ થી વધુ સ્થળોએ એકસાથે આયોજન થવું એ દર્શાવે છે કે દેશનો યુવા વર્ગ સ્વાસ્થ્ય અને નશા મુક્તિ માટે એકજૂથ થઈ રહ્યો છે.
ડિસેમ્બર ૨૦૨૪થી ડૉ. માંડવિયા દ્વારા શરૂ કરાયેલ આ અભિયાન સ્પોર્ટ્સ ઓથોરિટી ઑફ ઈન્ડિયા (SAI), MYAS, CFI, રાહગીરી ફાઉન્ડેશન, MY Bharat અને ખેલો ઈન્ડિયા કેન્દ્રોના સંયુક્ત સહયોગથી દેશના તમામ રાજ્યો અને કેન્દ્રશાસિત પ્રદેશોમાં યોજવામાં આવે છે.
