પાલીતાણાના મોટી પાણીયાળી ગામે જમીન બાબતે કૌટુંબિક કાકાનો પરિવાર પર હુમલો

પાલીતાણા તાલુકાના મોટી પાણીયાળી ગામે રહેતા અને સ્પર્ધાત્મક પરીક્ષાની તૈયારી કરતા યુવાન જયદેવસિંહ ગંભીરસિંહ વાળા (ઉ.વ.૨૨) ના પરિવાર પર જમીન બાબતના પારિવારિક ઝઘડામાં જીવલેણ હુમલો થયો છે. ફરિયાદીના દાદાના નામે રહેલી જમીનના ભાગ બાબતે કાકા વિક્રમસિંહ દડુભાઈ વાળા સાથે લાંબા સમયથી મનદુઃખ ચાલતું હતું. ગત તા. ૨૧ જુલાઈના રોજ કાકાએ ઘરે આવી જમીનમાં ભાગ ન આપવાની અને ઘર ખાલી કરવાની ધમકી આપી હતી.
ત્યારબાદ ૨૨ જુલાઈએ કાકા વિક્રમસિંહ અને તેમના મિત્ર હરપાલસિંહ ચૌહાણ (રહે. ઉમરળા) એ ફોન પર ગાળો આપી જાનથી મારી નાખવાની ધમકી આપી હતી. રાત્રે ૯ વાગ્યાના સુમારે જ્યારે પરિવાર જમી રહ્યો હતો ત્યારે બંને આરોપીઓએ ઘરમાં ઘૂસી ગાળાગાળી કરી હતી. હરપાલસિંહે છરી કાઢી હુમલાનો પ્રયાસ કર્યો હતો (જે પરિવારે પકડી લીધી હતી). જ્યારે વિક્રમસિંહે ફરિયાદીના માતા ગજરાબાને વાળ પકડી નીચે પાડી માર માર્યો હતો અને વચ્ચે પડેલા ભાઈ અનિરુદ્ધસિંહને પગના ભાગે લાકડાના ધોકા ફટકાર્યા હતા. આ મામલે પોલીસે બંને આરોપીઓ વિરુદ્ધ બી.એન.એસ. કલમ ૧૧૫(૨), ૩૫૧(૩), ૩૫૨, ૫૪ અને જી.પી.એ. ૧૩૫ મુજબ ગુનો નોંધી વધુ તપાસ હાથ ધરી છે.