ભાવનગર લોકલ ક્રાઇમ બ્રાન્ચની ટીમે મળેલી ચોક્કસ બાતમીના આધારે નારી ચોકડી સ્થિત સદગુરુ કોમ્પલેક્ષમાં દરોડો પાડીને જાહેરમાં ગંજીપતા વડે જુગાર રમતા ૫ શખ્સોને રૂ. ૬૧,૫૦૦ ની રોકડ રકમ સાથે ઝડપી પાડ્યા છે. આ અંગે એલસીબીના અનાર્મ પોલીસ કોન્સ્ટેબલ માનદિપસિંહ ઉપેન્દ્રસિંહ ગોહિલની ફરિયાદના આધારે વરતેજ પોલીસ સ્ટેશનમાં જુગારધારા કલમ-૧૨ હેઠળ કાયદેસરની કાર્યવાહી હાથ ધરવામાં આવી છે.
બનાવની વિગત મુજબ, તા. ૦૯/૦૮/૨૦૨૬ના રોજ રાત્રિના સમયે એલસીબી પોલીસ સ્ટાફ ભાવનગર શહેર વિસ્તારમાં પેટ્રોલિંગમાં હતો ત્યારે નારી ચોકડી પાસે આવેલા સદગુરુ કોમ્પલેક્ષની ઉપરની લોબીમાં કેટલાક ઈસમો લાઈટના અંજવાળે ગંજીપતાના પાના વડે પૈસાની હાર-જીતનો જુગાર રમી રહ્યા હોવાની બાતમી મળી હતી. જેથી પોલીસે પંચોને સાથે રાખી દરોડો પાડતા સ્થળ પરથી રાજેન્દ્રસિંહ વનરાજસિંહ ચુડાસમા (ઉ.વ.૩૪, રહે. મિલેટ્રી સોસાયટી પાછળ, પટેલ નગર, પ્લોટ નં.૧૧૮, ભાવનગર), જયપાલસિંહ નટુભા ચુડાસમા (ઉ.વ.૩૭, રહે. પ્લોટ નં.૫૫, રાધા કૃષ્ણ સોસાયટી, કર્મચારીનગર, ભાવનગર), શક્તિભાઈ નારસંગભાઈ મોરી (ઉ.વ.૩૪, રહે. નવા પ્લોટ, વરતેજ ગામ), ગોપાલભાઈ ગગજીભાઈ મેર (ઉ.વ.૪૦, રહે. ખોડીયાર ચોકડી પાછળ, શામપરા ગામ) અને યોગીરાજસિંહ બળુભા સોલંકી (ઉ.વ.૩૬, રહે. પ્લોટ નં.૨૭/એ, વૃંદાવન પાર્ક, નવાગામ, ભાવનગર) ગોળકુંડાળું વાળી જુગાર રમતા ઝડપાઈ ગયા હતા.
પોલીસે ઘટનાસ્થળેથી ગંજીપતાના ૫૨ પાના, રૂ. ૫૦૦ ના દરની ૧૨૩ ચલણી નોટો મળી કુલ રૂ. ૬૧,૫૦૦ ની રોકડ રકમ તથા એક ચાદર કબ્જે કરી પાંચેય આરોપીઓની અટકાયત કરીને આગળની તપાસ હાથ ધરી છે.
