જાનૈયા ભરેલી હોડી પલ્ટી જતાં 19 મહિલાઓના મોત

પાકિસ્તાનના પંજાબ અને સિંધ સરહદી વિસ્તાર પાસે સિંધુ નદીમાં એક હોડી પલ્ટી જતાં આ દુર્ઘટનામાં લગભગ 19 મહિલાઓના મોત થયા છે. હોડીમાં સવાર લોકો એક લગ્ન પ્રસંગમાં સામેલ થવા જઈ રહ્યા હતા. અધિકારીઓએ સોમવારે આ અંગેની જાણકારી આપી હતી. અધિકારીઓએ કહ્યું કે, જાનમાં જઈ રહેલા અન્ય લોકોની શોધ ચાલી રહી છે. તેમણે જણાવ્યું છે કે, હોડીમાં લગભગ 100 લોકો સવાર હતા. આ લોકો રહીમ યાર ખાનની નજીક 65 કિમી દૂર મચ્છકાના એક કબીલાના રહેવાસી હતા.
રહીમ યાર ખાનના ડેપ્યુટી કમિશનર સૈયદ મૂસા રજાએ મીડિયાને જણાવ્યું છે કે, રેસ્ક્યૂ ઓપરેશનમાં તરવૈયાઓ અને પાંચ એમ્બ્યુલન્સ અને એક જળ બચાવ વાન સહિત 30 કર્મચારીઓ ઘટનાસ્થળે હાજર છે. હાલમાં 19 મૃતદેહ મળી આવ્યા છે અને આ તમામ મહિલાઓ છે. અને બાકીના લોકોની પણ શોધ કરી રહ્યા છીએ.